Fəalların həbsi vətəndaş cəmiyyətinin parçalanmasına yönəlib

Siyasi Məhbusların Monitorinq Mərkəzi (SMMM) hüquq müdafiəçisi İntiqam Əliyevin məhkəməsi ilə əlaqədar bəyanatla çıxış edib.

Turan-a daxil olan bəyanatda digər fəallar kimi İ.Əliyevin də həbsi vətəndaş cəmiyyətinin parçalanması üzrə planın tərkib hissəsi adlandırılıb.

İ.Əliyevin səhhətində ciddi problemlərin olmasına baxmayaraq, o, ev həbsinə buraxılmayıb. “İş üzrə istintaq çoxsaylı hüquq pozuntuları ilə müşayiət olunur. Təhqiqatın monitorinqi göstərir ki, istintaq qərəzli, cinayət işi sifariş xarakterlidir”, - bəyanatda vurğulanır.

İntiqam Əliyev, Leyla Yunus, Arif Yunus və başqalarının həbsi vətəndaş cəmiyyətinin parçalanması planının tərkib hissəsi kimi qiymətləndirilir. Sözügedən şəxslərin azadlığa buraxılması və şəffaf məhkəmənin keçirilməsi tələb olunur.

İntiqam Əliyev qanunsuz sahibkarlıq, vergidən yayınma, vəzifə səlahiyyətlərindən sui-istifadə kimi ittihamlarla həbs olunub. Həbsin əsl səbəbi İ.Əliyevin hüquq-müdafiə fəaliyyəti və Avropa İnsan Hüquqları Məhkəməsinə ölkə vətəndaşlarının 200 şikayətini hazırlamasıdır.

* SMMM 2014-cü ilin payızında bir qrup “siyasi məhbus” tərəfindən yaradılıb.—06B--