F.Əmirlinin vəsatəti təmin olunmadı

Fevralın 8-də Nəsimi rayon Məhkəməsində Azərbaycan Xalq Cəbhəsi Partiyası AXCP sədrinin köməkçisi, "Azadlıq" qəzetinin yayım direktoru Faiq Əmirlinin ev dustaqlığına buraxılması haqqında verilən vəsatətə baxılıb. Bu haqda Turan-a F.Əmirlinin vəkili Aqil Layıcov bildirib.

Vəkil vəsatətin təmin olunmadığını söyləyib: “F.Əmirli mədəsindəki problemlrədən əziyyət çəkir. Bu haqda dəfələrlə demişik, Penitensiar Xidmətin nəzərinə də çatdırılıb. O, mədə xəstəliyinə görə həbs şəraitində saxlanıla bilməz, pəhriz yeməklə təmin edilməlidir, odur ki, həbs-qətimkan tədbirinin ev dustaqlığı ilə əvəz olunması məsələsini qaldırdıq, hakim də bunu təmin etmədi”.  

Xatırladaq ki, F.Əmirli 2016-cı il avqustun 20-də saxlanılıb. Baş Prokurorluğun Ağır Cinayətlər üzrə İstintaq İdarəsində ona qarşı Cinayət Məcəlləsinin 283.1 (Milli, irqi, sosial və ya dini düşmənçilik) və 168.1-ci (Dini məzhəbləri yaymaq və dini ayinlərin icrası adı altında fəaliyyət göstərmək və bu fəaliyyətlə ictimai asayişi pozmaq) maddələri ilə cinayət işi qaldırılıb.

2016-cı ildə Türkiyədə dövlət çevrilişinə cəhd edən “Hizmət” hərəkatı ilə əlaqədə təqsirli bilinir.

AXCP bəyanat yayaraq, bu ittihamı uydurma adlandırır və partiyaya təzyiqin tərkib hissəsi adlandırır. F.Əmirlinin həbsindən sonra “Azadlıq” qəzetinin fəaliyyəti dayandırılıb. -05B-