Fikrət Fərəməzoğlu ev dustaqlığına buraxılmayıb

Nərimanov Rayon Məhkəməsi jurnalist Fikrət Fərəməzoğlunu ev dustaqlığına buraxmayıb. Bu barədə Turan-a onun vəkili Elçin Sadıqov məlumat verib.

Müdafiə tərəfi hesab edir ki, ev dustaqlığının jurnalistin barəsində açılan cinayət işinin araşdırılmasına heç bir hansı mənfi təsiri yoxdur.

Jam.az saytının baş redaktoru F.Fərəməzoğlu 2016-cı il iyunun 30-da həbs edilib. Ona qarşı Cinayət Məcəlləsinin 182-ci (hədə-qorxu ilə rüşvət tələb etmə) maddəsilə ittiham irəli sürülüb.

DİN bildirib ki, jurnalist iyunun 30-da bir sahibkardan 3000 manat alarkən saxlanılıb.

DİN həmçinin bildirib ki, F.Fərəməzoğlu bir qrup şəxslə birgə çoxsaylı sahibkar və vəzifəli şəxsin barəsində rüsvayedici məlumatlar yaymaq hədəsi ilə onlardan külli miqdarda pul alıb.

İyulun 2-də Nərimanov Rayon Məhkəməsi F.Fərəməzoğlunun barəsində 3 aylıq həbs qərarı verib. O, həbsdən sonra vəkildən imtina edib.

F.Fərəməzoğlu 10 il öncə də cinayət məsuliyyətinə cəlb olunmuşdu. O zaman “24 saat” qəzetinin baş redaktoru olan F.Fərəməzoğlu daxili işlər naziri Ramil Usubovun şərəf və ləyaqətin qorunmasına dair iddiası üzrə məhkəməyə çəkilmişdi. Məhkəmə jurnalisti şərti olaraq 1 il müddətinə azadlıqdan məhrum etmişdi.

Son illər F.Fərəməzoğlu bir neçə dəfə prokurorluğa çağırılıb. Ona yazılarına görə xəbərdarlıq edilib. -0-