Fövqəladə hallar nazirinin müavini Zaqatalada zəlzələnin nəticələrini araşdırır (YENİLƏNİB)

Dünənki zəlzələdən sonra əhali arasında narahatlıq hiss olunub. Təkandan sonra hündürmərtəbəli evlərin yuxarı mərtəbələrində yaşayan  insanlar müvafiq yerlərdə yerləşdirilib. Əvvəlki zəlzələ zamanı evləri bərpa-gücləndirmə üçün müəyyən edilmiş sakinlər üçün təhlükə çox olduğundan həmin sakinlərə evlərindən istifadə etməməsi tövsiyə edilib.  Bu barədə Zaqatala Rayon İcra Hakimiyyəti başçısının müavini Elman Ramazanov Turan-a bildirib.

İyunun 29-da Zaqatala şəhərindən (Bakıdan 418 kilometr şimal-qərb) 14 km. cənub-qərbdə yerin 9 kilometr dərinliyində 5.3 bal gücündə zəlzələ qeydə alınıb. Zəlzələ episentrə yaxın yaşayış məntəqələrində 5.0 bala qədər hiss olunub.

E.Ramazanovun sözlərinə görə, zəlzələ nəticəsində Dombabinə kəndində iki ev uçub, Faldarlı, Sabunçu, Göyəm kəndlərində evlərin bir hissəsinin uçması halları qeydə alınıb.

Hazırda fövqəladə hallar nazirinin müavini Ragim Lətifovun rəhbərliyi ilə komissiya rayona gəlib. Yerlərdə baxışlar başlayıb. “Hazırda yerlərdə icra nümayəndəlikləri ilə dəqiqləşdirmə aparılır ki, kimlərin evləri zərər çəkib. Texniki baxış üçün 16 mütəxəssis gəlib. Onlar yerli icra qurumlarının nümayəndələri ilə birgə 5 qrupda baxışlara başlayacaq”, - o qeyd edib.  

İcra başçısının müavinin sözlərinə görə, əvvəlki zəlzələdən də (2012-ci ilin may və oktyabr aylarında rayonda iki güclü zəlzələ nəticəsinə yüzlərlə ev dağılıb) hələ tikilib istifadəyə verilməmiş 400-dək ev var. Bu evlərlə bərabər indi ziyan dəymiş evlər də yenidən tikiləcək və ziyan çəkənlərə pul vəsaiti veriləcək.

Zəlzələ nəticəsində xəsarət alan, xəstəxanaya müraciət edən olmayıb. Amma stress halları  olub.

Yeni  təkanlar qeydə alınmayıb.-03B- 

2014 İyun 30 (Bazar ertəsi) 09:10:13

İyunun 29-da axşam Zaqatalada baş vermiş zəlzələ nəticəsində Göyəm və Muxax kəndlərində iki ev qismən dağılıb. Bu barədə Turan-ın regional müxbiri məlumat verib.

Bundan əlavə, iki il öncə zəlzələ nəticəsində ziyan dəyən evlərdəki çatlar dərinləşib.

Zərərçəkən yoxdur. Lakin bəzi adamlar qorxudan stress keçiriblər. Çoxları yeni yeraltı təkanların olacağından ehtiyat edərək küçələrə çıxıb.

Rayon Seysmoloji Xidmətinin məlumatına görə, ötən gecə bir neçə yeraltı təkan qeydə alınıb. Lakin onlar zəif olduğundan əhali hiss etməyib. -0-

2014 İyun 29 (Bazar) 23:39:20

Bazar günü yerli vaxtla saat 22:26-da Zaqatala rayonunda zəlzələ baş verib. Respublika Seysmoloji Mərkəzinin məlumatına görə, episentrdə - Zaqatala şəhərinin 14 km. cənub-qərbində yeraltı təkanların gücü 5,2 olub.

Episentrin yaxınlığındakı yaşayış məntəqələrində yeraltı təkanlar 6 bal gücündə hiss edilib.

Yeraltı təkanlar Qax və Şəkidə də hiss edilib.-0-

2014 İyun 29 (Bazar) 22:41:18

 İyunun 29-da axşam saat 22.30 radələrində Azərbaycanın şimal-qərbində, Zaqatala rayonunda zəlzələ olub, deyə yerli mənbələr Turan-a bildirib.

Güclü təkanlar rayon mərkəzində hiss edilib.

Zəlzələnin gücü məlum deyil, çünki rəsmi informasiya yoxdur.Dağıntı və tələfat barədə məlumat verilmir.

Şahidlərdən biri bildirib ki, zəlzələnin gücü 7 may və 14 oktyabr 2012-ci ildə Zaqatalada baş verən zəlzələnin gücünə yaxın olub (5-7 ball). O vaxt yüzlərlə ev dağılmışdı.—0—