Futbolçu Cavid Hüseynov məhkəmədə ifadə verib

Yanvarın 26-da Bakı Ağır Cinayətlər Məhkəməsində jurnalist Rasim Əliyevin ölümündə təqsirləndirilən şəxslərin cinayət işi üzrə məhkəmə prosesində futbolçu Cavid Hüseynov şahid qismində ifadə verib.

Rasim Əliyev 2015-ci il avqustun 8-də bir qrup şəxs tərəfindən döyülüb. Jurnalist xəstəxanaya yerləşdirilib və avqustun 9-da orada vəfat edib. Faktla bağlı qaldırılan cinayət işi üzrə Kənan Mədətov, Camal Məmmədov, Samir Mustafayev, Elşən İsmayılov, Arif Əliyev və futbolçu Cavid Hüseynov tutulub. Bir müddət sonra cinayət işinin materiallarından Cavid Hüseynovun cinayət işi ayrılaraq ayrıca icraata verilib.

Cavid Hüseynov “Qəbələ” futbol komandasının hücumçusudur. Jurnalistlə insident Facebook səhifəsində C.Hüseynovla bağlı tənqidi status yazdıqdan sonra baş verib.

Vəkil Fariz Namazlı Turan-a bildirib ki, C.Hüseynov jurnalistin ölümündə özünü günahkar bilmir və bibisi oğlu  Elşən İsmayılovdan başqa təqsirləndirilən şəxslərdən heç kimi tanımır.

“Elşən Rasim Əliyevin Facebook-da yazdığı statusdan əsəbi idi.  Mən Rasimlə telefonla danışdım və dedim ki, fikir verməyin. Lakin Elşən dedi ki, Rasim anama söyüb, bu, şəxsi məsələdir. Mənim onların arasında baş verən hadisədən xəbərim olmayıb. Sonra bildim ki, Rasimi xəstəxanaya yerləşdiriblər, yanına getdim. Bir gün sonra isə vəfat etdiyini eşitdim”, - C. Hüseynov bildirib. O qeyd edib ki, R.Əliyevin öləcəyini gözləmirdi.

Sonra prosesdə digər şahidlər ifadə veriblər.

Vəkil məhkəmə istintaqının gedişi ilə razılaşmır və onun vəsatətlərinin təmin edilmədiyini bildirir. “Həmçinin məhkəmə zalı əvvəlcədən digər şəxslərlə  doldurulur, bir çox müstəqil jurnalistlər və hətta bəzən zərərçəkmişlərin qohumları zala buraxılmır”, - o qeyd edib. 

Proses fevralın 2-də davam edəcək.-03B-