�Gəncə işi� üzrə məhkəmə prosesində insident

Bakı/02.05.19/Turan: Bu gün Sabunçu Rayon Məhkəməsində Gəncə hadisələri ilə bağlı ittiham olunan digər bir qrupun məhkəmə prosesində insident baş verib.

Hüquq müdafiəçisi Oqtay Gülalıyev bildirib ki, bir neçə gün öncə infarkt keçirmiş müttəhim Şahin Verdiyevi Ədliyyə Nazirliyinin xəstəxanasından məhkəməyə gətiriblər. Bu, digər müttəhimlərin və onların qohumlarının hiddətinə səbəb olub.

Onlar hakim Dadaş İmanovdan prosesi dayandırmağı tələb ediblər, ancaq o, buna məhəl qoymayıb.

"Biz Şahinin pis vəziyyətdə olduğunu özümüz gördük, sifəti əyilmişdi, rəngi solğun, hərəkətsiz idi", - hüquq müdafiəçisi deyib.

Müttəhimlərdən biri, Asif Cavadov keçirdiyi stressdən bayılıb. Bundan sonra proses dayandırılıb və təcili yardım çağırılıb.

Digər müttəhim qışqıraraq deyib ki, bu ədalətsizliyə etiraz olaraq intihar edəcək.

* 2018-ci il iyulun 3-də Gəncədə şəhərin o zamankı icra başçısı Elmar Vəliyevə qarşı sui-qəsd olub. Gəncə sakini Yunis Səfərov E.Vəliyevi və onun cangüdənini yaralyıb.

Bundan sonra sosial şəbəkələrdə iyulun 10-da Gəncə şəhər administrasiyasının önündə E.Vəliyevə qarşı etiraz aksiyası təyin edilib.

İyulun 10-da DİN Gəncədə iğtişaşların baş verdiyini bildirib. Hadisə zamanı iki polis əməkdaşı öldürülüb. Bundan sonra dindarlar arasında kütləvi həbslər baş verib. 60-a yaxın adam cinayət məsuliyyətinə cəlb edilib. Daha 6 nəfər silahlı müqavimət zamanı öldürülüb.

Martın əvvəlində ümumi sayı 14 nəfərdən ibarət iki qrupun barəsində hökm çıxarılıb. Onlar kütləvi iğtişaşlarda iştirakda və polis əməkdaşlarına qarşı güc tətbiqində ittiham olunaraq 5 ildən 8 ilədək azadlıqdan məhrum ediliblər.21С-