Gənlər arasında futbol üzrə Avropa Çempionatına gələnlər vizanı hava limanında alacaqlar

Prezident İlham Əliyev 17 yaşınadək futbolçular arasında futbol üzrə Avropa Çempionatının final mərhələsinin təşkili və keçirilməsi ilə bağlı Azərbaycana gələcək əcnəbilər və vətəndaşlığı olmayan şəxslər üçün viza prosedurlarının sadələşdirilməsi haqqında sərəncam imzalayıb.

Sənədə görə, Avropa birinciliyilə əlaqədar ölkəyə gələnlər Azərbaycan Xarici İşlər Nazirliyinin Konsulluq İdarəsinin ölkənin beynəlxalq hava limanlarında yerləşən struktur bölmələrində viza ala bilərlər.

Viza verilməsi üçün əsas hesab edilən sənədlər Azərbaycan Futbol Federasiyaları Assosiasiyasının (AFFA) rəsmi dəvət məktubu;

Avropa Futbol Assosiasiyaları Birliyinin (UEFA) müvafiq qaydalarına uyğun olaraq akkreditədən keçməni təsdiq edən sənəd;

17 yaşınadək futbolçular arasında futbol üzrə Avropa çempionatının final mərhələsinin oyunlarına bilet və ya biletin əldə olunmasını təsdiq edən sənəddir.

Sərəncamda göstərilən şəxslər viza almaq üçün aşağıdakı müddətlərdə müraciət edə bilərlər:

AFFA-nın rəsmi dəvət məktubu əsasında gələn şəxslər, habelə təşkilati məsələlərlə əlaqədar gələn və  UEFA-nın müvafiq qaydalarına uyğun olaraq akkreditədən keçmiş şəxslər  2016-cı il aprelin 1-dən iyunun 1-dək;

17 yaşınadək futbolçular arasında futbol üzrə Avropa çempionatının final mərhələsində iştirak edən komandaların üzvləri və nümayəndə heyətləri  2016-cı il aprelin 20-dən mayın 25-dək; UEFA-nın müvafiq qaydalarına uyğun olaraq akkreditədən keçmiş jurnalistlər, habelə 17 yaşınadək futbolçular arasında futbol üzrə Avropa çempionatının final mərhələsinin oyunlarına bilet əldə etmiş şəxslər  2016-cı il mayın 1-dən 25-dək.

Fevralın 15-də dövlət başçısı “17 yaşınadək futbolçular arasında futbol üzrə Avropa çempionatının final mərhələsinin 2016-cı ildə Azərbaycan Respublikasında keçirilməsinin təmin edilməsi haqqında” sərəncam imzalayıb.

Sənəddə müxtəlif nazirlik və idarələrin vəzifələri müəyyən edilib.

Qeyd edək ki, U-17 üzrə 15-ci Avropa Çempionatı mayın 5-21-də Bakıda keçiriləcək. Avropa birinciliyində 16 komanda iştirak edəcək. 1-2-ci yerləri tutan komandalar kubok sistemi üzrə mübarizəni davam etdirəcək. Qalib final matçında müəyyən ediləcək.

Matçlar dörd stadionda: Bakı Olimpiya  Stadionu, “Bakcell arena”, “Dalga arena” və Suraxanı qəsəbəsində Tofiq İsmayılov adına stadion.

Azərbaycan yığması Avropa Çempionatında təsnifat raundunda iştirak etmədən ev sahibliyi hüququ ilə çıxış edəcək. Digər 15 iştirakçı təsnifat raundu zamanı müəyyən ediləcək.–06D-