Gürzə uşağı öldürdü

Salyan  rayonununun Şəkərli kənd sakini,  2007-ci il təvəllüdlü Gülnar Akif qızı Didarovanı yaşadığı evin həyətində oynayarkən ilan vurub.  Bu barədə Turana Demokratiyaya Yardım İctimai Birliyinin sədri Emil Məmmədov  bildirib.

Atası Akifin bildirdiyinə görə uşağın qışqırtısına gələrkən onu vuran ilanın  yoğun gürzə olduğunu görüb. Uşağı ilan çalmasından bir qıdır əvvəl isə ev sahibləri həyətdəki toyuqlardan birinin qəfildən öldüyünü görüblərmiş.Sən demə toyuğu da bu qəzəbli gürzə öldürübmüş. 6 yaşılı qızcığaz Salyan rayon mərkəzi xəstəxanasına çatdırılsa da zəhər əleyhinə zərdab olmadığından keçinib.

Məsələ ondadır ki bu kənddə indiyədək bu böyüklükdə gürzəyə rast gəlinməyib.Şəkərli kəndi isə iyunun 27-də 1000 hektarlıq ərazisi yanmış Şirvan Milli Parkına bitişik ərazidə yerləşir.Ehtimal etmək olar ki həmin gürzə də yanğından qurtulmaq üçün kəndə gəlib. Amma Şirvan Milli Parkından bildirdilər ki bu ehtimal özünü doğrultmur.Çünki ilan kəndə sürünmək üçün ya su kanalını keçməli, ya da avtomobil yolu boyunca xeyli sürünməli idi ki bu da mümkün deyil.Onlar da baş verən faciəni Ələt-Astara yolunu inşa edənlərin üstünə atdılar.Belə ki yaxınlıqda inşa edilən Ələt-Astara avtomobil yoluna torpaq Babazanlı dağlarından daşınır ki bu insan ayağı dəyməyən ərazi də ilanların məskəni sayılır.Amma  ehtimallardan asılı olmayaraq vəhşi təbiətə uzanmış əlin  və xəstə səhiyyəmizin güdazına 6 yaşlı qızcığaz  həyatdan getdi.-0-