Hadisə şahidi: Deyirik həkim çağırın, çağırmırlar

“Sentyabrın 1-də Prezident Administrasiyasının önündə insident yaşanıb, yanında iki uşaqla PA-ya qəbula gələn xanımın üzərinə polis qışqırmağa başlayıb və qadın huşunu itirib”. Bu barədə Turan-a hadisəyə şahid olan şəxs bildirib.

Onun sözlərinə görə, həmin gün şikayətə gələnlər hüquq-mühafizə orqanları ilə iş şöbəsinin müdiri Fuad Ələsgərovla görüşməli idilər.

Hadisə şahidi olan şəxs insidentin baş verməsinin səbəbinin məlum olmadığını deyir. O, istər polislərin, istərsə də PA-nın mühafizə əməkdaşlarının insana laqeydliyindən şikayət edir: “Təsəvvür edin, insan huşunu itirib, komadadırmı, ya daha hansı durumdadırsa məlum deyil. Oradakı insanlar müraciət edir ki, həkim çağırın, nümayişkaranə deyirlər ki, çağırmırııq”.

Hadisə şahidinin sözlərinə görə, şikayətçilər təcili yardıma zəng ediblər, təcili yardım gəlib, iynə vurulub, sonra həkimlər gediblər: “Amma bundan sonra yenə də qadının huşu özünə gəlmədi, məcbur olub yenidən təcili yardım çağırdıq. Bu dəfə həkimlər narazılıq edirdilər ki, niyə bizi çağırmısınız”.

Şahidin sözlərinə görə, naşatır spirti iylətdirmək belə, qadının özünə gəlməsinə kömək edə bilməyib. Bundan sonra şikayətçilər həkimlərdən qadını uşaqları ilə birgə xəstəxanaya aparmağı tələb ediblər, ancaq bundan sonra onu xəstəxanaya aparmaq mümkün olub: “Buraya qədər hadisədən xəbərimiz var, amma xəstəxanaya getdikdən sonra o qadının vəziyyəti necə olub, özünə gəlibmi, ya yox,

bunu bilmirik. Amma bildiyimiz budur ki, görünür hələ də bir çoxları vətəndaşla elementar davranış qaydalarından belə məhrumdurlar”. -05B-