![Media-icmal 03.09.2016](https://turan.az/resized/media/2016/main/090300167581-750-500-resize.webp)
İqtisadiyyatın inkişafı, Milli Şuranın 11 sentyabr mitinqi, tikintilərin zəlzələyə davamlılığı, işszilik problemi bugünki medianın aparıcı mövzusudur.
İqtisadiyyatın inkişaf nümunəsi
“Azərbaycan” qəzetində “Azərbaycanın gördüyü böyük işlər möhkəm bünövrəyə əsaslanır” (http://www.azerbaijan-news.az/index.php?mod=3&id=104293 ) sərlövhəli məqalə yer alır.
Yazı bu günlərdə “Şahdəniz-2” platformasının özül - dayaq bloklarının dənizə yola salınmasına həsr edilib. Müəllif bu faktı Azərbaycanın iqtisadi inkişaf yolunda atdığı daha bir uğurlu addım kimi dəyərləndirir. Müəllifə görə, dayaq blokunun Bakı Dərin Özüllər Zavodundan dənizə yola salınması da təsadüfi deyil: “O zavoddan ki, keçən əsrin 70-80-ci illərində onun məhz Azərbaycanda tikilməsi ümummilli lider Heydər Əliyevin böyük uzaqgörənliyi və mübarizəsi ilə gerçəkləşmişdi”.
Müəllif dayaq blokunun dənizə yola salınmasında iştirak edən prezident İlham Əlyevin bu münasibətlə Azərbaycan xalqını təbrik etməsinə və bu uğuru dəyərləndirməsinə diqqət çəkir: “Bu, tarixi hadisədir. “Şahdəniz” layihəsi 20 il əvvəl imzalanıb və bu illər ərzində uğurla icra edilir. “Şahdəniz-2”nin ölkəmiz üçün əhəmiyyəti böyükdür”.
Müəllif dayaq bloklarının dənizə yola salınmasını həm də Avropanın dərinliklərinə uzanacaq qaz kəmərinin çəkilişi ilə bağlı işlərin möhkəm özüllər üstündə durması kimi dəyərləndirir. Daha sonra müəllif dayaq blokun parametrləri barədə danışır, blokların quraşdırılması prosesində əməyi olanların 90%-nin Azərbaycan vətəndşları olduğunu vurğulayır: “Vaxtilə xarici şirkətlərlə birgə həyata keçirilən layihələrdə az sayda yerli sakinlər çalışırdı, Azərbaycan dövləti həmin layihələrdə işləyənlərin əksəriyyətinin yerli vətəndaşlar olmasını qarşıya məqsəd qoymuşdu ki, indi bu, artıq reallığa çevrilib”.
Məqalədə “Şahdəniz-2” layihəsinin uğurla irəlilədiyi, tikinti işlərinin 77%-nin bitdiyi vurğulanır. Yazıda layihə çərçivəsində ildə 16 milyard kubmetr qaz və gündə 120 min barelədək kondensat əldə ediləcəyi və bunun 6 milyard kubmetrinin Türkiyəyə, 10 milyard kubmetrinin isə Avropadakı alıcılara çatdırılacağı xatırladılır.
Müəllifə görə, dayaq blokunun tikintisinin uğurla başa çatdırılması “Şahdəniz-2”də işlərin rəvan getdiyini göstərir: “Əslində, bu, mühüm nailiyyətdir və Azərbaycanın həqiqətən də böyük işlər görməyə qadir ölkə olduğunu bir daha təsdiqləyir. Təməli ulu öndər Heydər Əliyev tərəfindən qoyulmuş işlər inamla irəliləyir, getdikcə daha geniş miqyas alır”.
Gəlin və sözünüzü deyin
“Azadlıq” qəzeti Milli Şuranın Konstitusiyaya nəzərdə tutlan dəyişikliklərə və ölkədəki ağır iqtisadi duruma etiraz olan sentyabrın 11-nə təyin etdiyi mitinqlə bağlı qurumun sədri Cəmil Həsənlinin vətənaşlara müraciətinə diqqət çəkir.
(http://www.azadliq.info/155275.html)
Şura sədri sentyabrın 11-nə mitinq təyin edildiyini, aksiyanın saat 17-də metronun “İnşaatçılar” stansiyasının yaxınlığındakı “Məhsul” stadionunda başlanmasının nəzərdə tutulduğunu bildirir. Bununla bağlı Bakı şəhər icra hakimiyyətinə müraciət edildiyi deyilir. Vətəndşalara dəvətdə deyilir ki, söhbət icazəli və dinc mitinqdən, vətəndaşın konstitutsion haqlarından gedir.
C.Həsənli mitinqin hədəflərini də vətəndaşlara göstərməyi arxa plana keçirmir: “Mitinqin hədəfi “Monarxiyaya YOX! Talana SON!”dur. Gəlin, Siz də öz iştirakınızla ölkəni bürümüş korrupsiyaya, rüşvətxorluğa, haqqınızın talan edilməsinə SON deyin. Gəlin, Siz də 26 sentyabrda monarxiyaya doğru atılan addıma YOX deyin”.
Şura sədri aksiya keçirilməsinin özünün belə sosial sifarişdən irəli gələn bir məsələ olduğunu bidirir: “Sizlərdən gələn sosial sifarişi nəzərə alaraq nəhayət ki, biz sentyabr ayının 11-nə ilk mitinqi təyin etdik. Gəlin, birlikdə ölkə konstitusiyasına edilən anti-konstitusion müdaxiləyə YOX deyək! Gəlin, VƏTƏN torpaqlarının 20 ildən artıq düşmən tapdağında qalmasına YOX deyək! Gəlin birlikdə vətəndaşın haqqının, hüququnun tapdanmasına, əhalinin sərvətlərinin talan edilməsinə, onun səfalətə sürüklənməsinə, xalqın səs haqqının mənimsənilməsinə SON deyək”
Milli Şura sədrinin fikrincə, ölkəni monarxiya iddialarından, hüdudsuz talançılıq və hüquqsuzluqdan yalnız millətin iradəsi xilas edə bilər: “Öz gücünə inan və 11 sentyabrda onu ifadə et!” deyə Milli Şura sədri vətəndaşlara müraciətini yekunlaşdırır.
Paytaxtdakı tikintilər zəlzələyə davamlıdırmı?
“Exo” qəzetində isə “Bakıdakı tikintilər neçə bala davam gətirər?” sərlövhəli
(http://www.echo.az/article.php?aid=105046) məqaləni oxumaq olar.
Müəllifin hədəfində Bakıdakı tikintilərin zəlzələyə nə dərəcədə davam gətirməsi dayanır və bunu ekspertlərlə müzakirə edir.
Müstəqil Arxitektorlar Birlyinin sədri Zemfira Budaqova hansı binaların zəlzələ vaxtı dağılmasını söyləməyin mümkünsüz olduğunu deyir. Ekspertə görə, amma hansı binaların maksimal risk zonasında və güclü zəlzələ olduqda 100% doğruluqla dağılacağını demək olar: “Söhbət metronun “Sahil” stansiyası üzərində tikilən binadan gedir, bu bütün arxitektura normalarına zidd, metropoliten üzərindəki boşluqda tikilib”. Ekspertə görə, qatarların daimi hərəkətindən irəli gələrək onsuz da davamsız olan binanın özülləri yerindən oynayıb.
Ekspertə görə, bu mənada daha bir bir bina risk zonasındadır: “Bu, Bakının simvolu olan “Flame Towers” binasıdır. Belə bir binanın sürüşmə zonasında tikilməsi düşünülməmiş addımdır”.
Ekspertə görə, sovet dönəmində tikilən binalar 7-8 bal zəlzələyə hesablanaraq inşa edilib. Amma son illərdə qlobal istilikdən irəli gələrək buzlaqların əriməsilə qrunt suları əhəmiyyətli dərəcədə artıb, bu isə bünövrələri zəiflədir, odur ki, köhnə binaların 8 bal zəlzələyə davam gətirməsi inandırıcı deyil.
Ekspertin fikrincə, XX əsrin 60-cı illərində tikilmiş “xruşşovka” tipli binalar daha davamlıdır. Z.Budaqova yeni tikintilərin 9-10 bal zəlzələyə hesablanaraq tikildiklərini deyir, amma bunun nə qədər gerçək olmasını sual altına alır.
Respublika Seysmoloji Mərkəzinin rəhbəri Qurban Yetirmişli də təsdiq edir ki, hündürmərtəbəli binaların tikintisində etibarlı konstruksiyalardan istifadə edilir.
İşsizlik harayı: mənə kömək edin
“Bizim Yol” qəzeti “Bakıda gənc aclıqdan huşunu itirib yıxıldı” sərlövhəli məqaləni təqdim edir. (http://www.bizimyol.info/news/83927.html)
Müəllif deyir ki, himayəsində azyazşlı qızı və əlil anası olan İlkin Ağazadə paytaxta iş axtarmağa gəlibmiş. O, ictimaiyyətdən kömək istəyir: “Yaşamaq üçün mənə təcili iş lazımdır”
Müəllif deyir ki, qəzetin “whatsapp”ına göndərilən bir nömrə ilə İ.Ağazadəyə yetişiblər. Göndərilən mesajda deyilir: “Bu saatlarda ofisimizin qarşısında bir gənc oğlanın yıxıldığını görüb ona yardım etdik. Həyətə gətirdik. Acından yıxılıbmış. Məlum oldu ki, 24 yaşı var. 1 yaşında qızı və ayağı şikəst olan anası himayəsindədir. Evlidir. Sumqayıtdan Bakıya iş axtarmağa gəlib. İlkin yardım göstərdik. Qızı üçün bez və s. yardım etdik. Ona mümkün qədər iş tapmaqda yardım edək. Telefon nömrəsi: 055 872-62-31”.
Müəllif deyir ki, İ.Ağazadə iş axtarışının davam etdiyini təsdiqləyib. O, probleminin ictimailəşməsini və iş tapmaqda köməkliyin olunmasını istədiyini vurğulayıb. Bərbər peşəsinə yiyələnən İlkin bir ildir ailəlidir və bir övladı var. İş axtarmaq üçün müxtəlif təşkilatlara müraciət etsə də, bu müddət ərzində ona daimi iş təklif olunmayıb: “Müraciət etdiyim hər yerdən “gedin, biz sizinlə əlaqəda saxlayacağıq” deyiblər. Mən bərbərəm, amma dekorasiya işlərini də bacarıram. Hotellərə müraciət etmişəm. Bu istiqamətdə otellərdə və şadlıq saraylarında müəyyən işlər görmüşəm. Yəni təcrübəm var. Amma daimi işim yoxdur”, deyə İlkin Ağazadə bildirir.
İndi valideynlərilə darısqal otaqda yaşadığını deyən İlkin iş tapan kimi kirayə evdə yaşaya biləcəyini deyir. İ.Ağazadə ailənin hazırki durumunu belə təqdim edir: “Mən, həyat yoldaşım və övladım valideynlərimlə yaşayırıq. Bizim eyni evdə qardaşım da qalır, dözülməz şəraitdir. Mən istəyirəm ki, ailəm yaxşı mənzil şəraitində yaşasın. Yeməyə çörəyimiz olsun”, deyə İlkin Ağazadə bildirir.
İkinci qrup əlil olduğunu qeyd edən İlkin ağır işlərdə çalışmaq imkanının olmadığını dedi: “Mən onurğadan əməliyyat olunmuşam. Ağır iş görə bilmirəm. Dekorasiya işini görə bilərəm və ya otelərdə, şadlıq saraylarında mühafizə xidmətində çalışa bilərəm. Normal yaşamaq üçün mənə təcili iş lazımdır”.
Rəy yaz