Kobaxidze iqtisadi əməkdaşlığı müzakirə etmək üçün Bakıya gəlib

İrakli Kobaxidzenin başçılıq etdiyi Gürcüstanın nümayəndə heyəti cümə günü Azərbaycana gəlib. 

Səfər çərçivəsində hər iki ölkənin hökumət üzvlərinin iştirakı ilə Gürcüstan-Azərbaycan Hökumətlərarası İqtisadi Əməkdaşlıq Komissiyasının iclası keçiriləcək. 

Gürcüstan hökumətinin mətbuat xidmətinin məlumatına görə, prezident İlham Əliyevin İrakli Kobaxidze ilə görüşü keçiriləcək, daha sonra onlar mətbuat üçün birgə bəyanat verəcəklər.  

Eyni zamanda Gürcüstan baş nazirinin azərbaycanlı həmkarı Əli Əsədovla ayrıca görüşü keçiriləcək.

Gürcüstan nümayəndə heyətinin tərkibinə iqtisadiyyat və sabit inkişaf naziri Levan Davitaşvili, xarici işlər naziri Maka Boçorişvili, kənd təsərrüfatı naziri David Sonqulaşvili, mədəniyyət naziri Tnatin Ruxadze və hökumət administrasiyasının rəhbəri Levan Jorjoliani daxildir.

Turan Agentliyinə məlum olub ki, səfər çərçivəsində Bakıdakı "Qış Parkı"nın yuxarı hissəsində Gürcüstanın Bakıdaki səfirliyinin təməli atılacaq.

Xatırladaq ki, mübahisəli seçkilər nəticəsində formalaşdırılmış "Gürcü arzusu" hökuməti Qərb tərəfindən indiyədək tanınmayıb. 

Kobaxidze və onun nazirlər kabinetinin üzvlərinin indiyədək rəsmi xarici səfəri olmayıb.

Azərbaycan prezidenti İlham Əliyev "Gürcü arzusu"nu prezident seçkilərində qələbə münasibətilə təbrik edən ondan az dünya lideri arasındadır.