Hakim partiyanın üzvü Mehdi İbrahimov 8 gündür aclıq edir

Bakı/17.08.20/Turan: Penitensiar Xidmətin Koronavirus Xəstələri üçün 3 saylı Müalicə Müəssisəsində saxlanılan hakim “Yeni Azərbaycan” Partiyasının üzvü Mehdi İbrahimov səkkizinci gündür aclıq edir. Bu barədə Turan-a onun qardaşı Turan İbrahimov bildirib. Penitensiar Xidmətdən şərh almaq mümkün olmayıb.

Avqustun 14-də Ombudsman Aparatı bildirib ki, aparatın nümayəndələri Mehdi İbrahimova baş çəkiblər, o, barəsində aparılan istintaqın gedişatından narazı olduğunu bildirib.

Mehdi İbrahimovun ailə üzvlərinin verdiyi məlumata görə, o, hələ avqustun 10-da aclığa başlayıb.

O, iyulun 14-15-də keçirilən orduya dəstək aksiyasında saxlanılıb və karantin rejimini və koronavirus xəstəsi olduğu üçün tətbiq olunan özünütəcrid rejimini pozmaqda ittiham olunub. O, CM-in 139-1.1-ci maddəsi ilə 3 ilə qədər azadlıqdan məhrum edilə bilər.

Amma Mehdi İbrahimovun evdə qalmaq məcburiyyətində olduğunu sübut edən heç bir tibbi sənəd yox idi. Eyni zamanda, o, aksiyada heç bir qanunsuz əməl törətməyib.

Yaxınları hesab edirlər ki, həbsin səbəbi onun atası - məşhur müxalifətçi və keçmiş siyasi məhbus Məmməd İbrahimdir. O, iyulun 26-da saxlanılıb və ona qarşı CM-in 186.2.1-ci (zərər çəkmiş şəxsə böyük ziyan vurmaqla əmlakın qəsdən məhv edilməsi və ya zədələnməsi), 233-cü (ictimai qaydanın pozulmasına səbəb olan hərəkətlərin təşkili və ya belə hərəkətlərdə fəal iştirak), 315.1-ci (hakimiyyət nümayəndəsinə qarşı müqavimət və ya zorakılıq tətbiq etmək) və 278.1-ci (hakimiyyətin zorla ələ keçirilməsinə yönələn hərəkətlər) maddələri üzrə ittiham irəli sürülüb. Məmməd İbrahim 4 ay müddətinə azadlıqdan məhrum edilib.

Mehdi İbrahimov və Məmməd İbrahim hüquq müdafiəçiləri tərəfindən siyasi məhbus kimi tanınıb. -03B06-