Hakim vəsatətlərin heç birini təmin etməyib

Cümə axşamı Bakı Şəhər Ağır Cinayətlər Məhkəməsində AMAY Şİrkətlər Qrupunun yaradıcısı Abdulla Abdullayevin işi üzrə  məhkəmə prosesinə hazırlıq iclası keçirilib.

Müdafiə tərəfi prosesə sədrlik edən hakim Əfqan Hacıyevə vəsatətlərini təqdim edib. Vəsatətlər A.Abdullayevin barəsində həbs qətimkan tədbirinin dəyişdirilməsi, müdafiə işinin yaxşı təşkili üçün A.Abdullayevin vəkillərinin yanında əyləşməsinə şəraitin yaradılması ilə bağlı olub. Bundan əlavə, A.Abdullayevlə bağlı cinayət işi mülki məsələ əsaslı olduğu üçün məhkəmənin icraata qəbul etməməsi barədə vəsatət qaldırılıb. Habelə, ittihamnamə və cinayət işi daxilində hər ittiham epizodu üzrə prokurorluğun müdafiə tərəfinə və ya hakimə sübutlar siyahısı təqdim etməsi ilə bağlı vəsatət qaldırılıb. Hakim qaldırılan vəsatətlərdən heç birini qəbul etməyib.

İttiham tərəfi A.Abdullayevin barəsində həbs qətiimkan tədbirinin dəyişdirilməsinə “mühakimə prosesindən yayına bilməsi, zərərçəkənlərə təsir etmək imkanlarına malik olması” arqumentləri gətirərək imtina edib.

Hazırlıq iclasında danışan A.Abdullayev istintaqı qərəzli olmaqda, mülki əsaslı bir işi cinayət müstəvisinə gətirməkdə ittiham edib.

İtitham və müdafiə tərəflərini dinləyən hakim cinayət işini məhkəmə baxışına qəbul etdiyini bildirərək hazırlıq iclasını bağlı elan edib, ilk məhkəmə prosesini fevralın 19-na təyin edib.

Xatırladaq ki, A.Abdullayev 2014-cü ilin aprelində həbs edilib. Ona qarşı Cinayət Məcəlləsinin dələduzluq, külli miqdarda mənimsəmə, səlahiyyətdən sui-istifadə maddələrilə ittiham irəıli sürülüb.-05C-