Hakimiyyəti tənqid edən müstəntiqin barəsində cinayət işi başlanıb

Zərdab Rayon Prokurorluğunun keçmiş müstəntiqi Rüfət Səfərovun konkret cinayət əməlləri ilə bağlı müraciətlər daxil olub.

Bunu baş prokurorun müavini,  Korrupsiyaya Qarşı Mübarizə Baş İdarəsinin rəisi Kamran Əliyev 2015-ci il ərzində korrupsiyaya qarşı mübarizə sahəsində görülmüş işlərlə bağlı bu gün keçirilən mətbuat konfransında deyib.

K.Əliyev bildirib ki, R.Səfərovun cinayət işi üzrə istintaq aparılır. Onun sözlərinə görə, R.Səfərov korrupsiya əməllərində ittiham olunur.

Qeyd edək ki, R.Səfərov bir müddət əvvəl prokurorluq orqanlarından xaric edilib və barəsində cinayət işi başlanıb. Cinayət işi Korrupsiyaya Qarşı Mübarizə Baş İdarəsində Cinayət Məcəlləsinin 311-ci (rüşvət alma) maddəsi ilə başlanıb.

Parlamentin keçmiş deputatı və hakim Yeni Azərbaycan Partiyasının təsisçilərindən biri olan Eldar Sabiroğlunun oğlu Rüfət Səfərov ədalətsizliyə və atasına qarşı təzyiqlərə etiraz olaraq dekabrın dekabrın 21-də Zərdab Rayon Prokurorluğunun müstəntiqi vəzifəsindən istefa verib.

Bundan sonra onun iş otağında və yaşadığı evdə axtarış aparılıb. Şəxsi komputeri götürülüb, mobil telefonlarına baxış keçirilib. R.Səfərov dekabrın 21-dən bunlara etiraz olaraq aclıq aksiyasına başlayıb.-16D