Hamlet İsaxanlının qızı ilə baş vermiş insidentin bir iştirakçısı həbs edilib

Bu gün Bakı Apellyasiya Məhkəməsində Zaur və Elin Məmmədov qardaşlarının işi üzrə paytaxt prokurorluğunun etirazına baxılıb. Qardaşlar “Xəzər” Universitetinin rektoru Hamlet İsaxanlının qızı Ülkər İsayevanı döyməkdə ittiham olunurlar.

Etirazın verilməsinə Xətai məhkəməsinin qardaşlara qarşı həbs qətimkan tədbirinin seçilməsindən imtina etməsi səbəb olub. Apellyasiya Məhkəməsi Zauru 2 ay müddətinə həbs edib. Elinin barəsində əvvəlki məhkəmə qərarını qüvvədə saxlayıb.

Martın 9-na keçən gecə Bakının “Azadlıq” prospekti və Ü.Hacıbəyov küçəsinin kəsişməsində baş vermiş insidentin küçə kameraları ilə çəkilmiş videogörüntülərinin  sosial şəbəkələrdə yayımlanması ilə bu iş böyük rezonans doğurub.

Bir sıra KİV bildirib ki, Elin və Zaur sərxoş vəziyyətdə olublar  və  saat 4:25-də heç bir səbəb olmadan tanışları Ülkər İsayevanı “BENTLEY”  avtomobilindən  yerə salaraq təpikləyiblər, asfaltın üstündə sürüyüblər.

Martın 12-də Bakı Şəhər Baş Polis İdarəsinin təqdimatı əsasında adıçəkilən şəxslər saxlanılıblar. Şəhər prokurorluğu Məmmədov qardaşlarının 221.2 (xuliqanlıq) maddəsi üzrə cəlb olunmasını və həbslərinə sanksiya verilməsini məhkəmədən xahiş edib.

Martın 14-də Xətai məhkəməsinin hakimi Raziyə Ataşova Məmmədov qardaşlarının məhkəmə zalından buraxılması barədə qərar qəbul edib.

Lakin prokurorluq bu qərardan etiraz verib.

Martın 17-də prokurorluğun etirazına baxılmasına başlanılıb və ayın 18-də davam edib. Həbs qətimkan tədbiri məsələsi ilə bağlı apellyasiya çəkişməsinin iki gün davam etməsi Azərbaycanın məhkəmə praktikası üçün nadir haldır.

Qardaşlar 221.2.1 maddə (qrup şəklində törədilmiş xuliqanlıq) üzrə təqsirli bilinirlər.

Zaur 2 ay müddətinə həbs olunub. Elin isə istintaq müddətində azadlıqda olacaq.

Maraqlı budur ki, KİV-də zərərçəkən kimi göstərilən Ü.İsayeva və onun atası bunu inkar edirlər.

Ü.İsayeva Facebook-da yazıb ki, sağ-salamatdır, heç bir zorakılığa məruz qalmayıb.

H.İsxanlı KİV-də bəyanatla çıxış edərək bildirib ki, zorakılığın qurbanı onun qızının Katya adlı tanışıdır. Sərxoş vəziyyətdə olan bu qız təhqiramiz ifadələr işlədib və gənclər onu maşından düşürüblər. Gəncləri saxlayanda guya Ülkər polislərə bildirib ki, döyülüb, lakin saxlananlara qarşı şikayətinin olmadığını deyib ki, onu buraxsınlar.

İttiham olunanlarını anası, jurnalist Gülnarə Məmmədova övladlarının bu insidentə bağlılığını inkar edir. Onun sözlərinə görə, onlar ziyalı gənclərdir, turizm şirkətində çalışırlar və   “BENTLEY”  avtomobili onlara məxsus deyil.

Bu hadisədə qaranlıq qalan çox məqamlar var. Hüquq-mühafizə orqanlarının ətraflı məlumat verməməsi müxtəlif şayiələrə səbəb olur.

Həmçinin müşahidə kameralarındakı videogörüntülərin sosial şəbəkələrə necə düşməsi də məlum deyil.

Zərəçəkən tərəfin şikayətinin olmamasını nəzərə alsaq polis və prokurorluğun həbs qətimkan tədbirinin seçilməsinə israr etməsi də təəccüb doğurur.

Eyni zamanda şübhəli bilinənlərin həbsi barədə polis və prokurorluğun təqdimatının təmin olunmasından birinci instansiya məhkəmənin imtina etməsi də nadir haldır.

Belə təəssürat yaranır ki, bu hadisənin nüfuzlu qüvvələrin maraqlarının toqquşması baxımından gizli səbəbləri var.–16B—