Hərbi prokuroluq I yarımilin yekunlarına dair

Ölkə Hərbi Prokurorluğu Silahlı Qüvvələr sistemində korrupsiyaya yol verən 43 şəxs barəsində 25 cinayət işini baxılmaq üçün hərbi məhkəmələrə göndərib.

Azərbaycanın hərbi prokuroru Xanlar Vəliyev bu haqda 2015-ci ilin I yarısının yekunlarına dair cümə günü keçirdiyi əməliyyat müşavirəsində bildirib.

X.Vəliyev bu addımı korrupsiyaya qarşı mübarizəni gücləndirmək kimi dəyərləndirib. O, bu tipli cinayətləri Silahlı Qüvvələrin qüdrətini zəiflədə biləcək cinayətlər kimi dəyərləndirib.

X.Vəliyev 2015-ci ilin I yarısında hərbi prokurorluq tərəfindən bir çox ağır cinayət hadisələrinin aşkarlandığını, qüvvədə olan cinayət-prosessual qanunvericiliyin tələblərinə əməl edilməsi üzərində nəzarətin gücləndirildiyin söyləyib.

Bəhs edilən dövrdə dövlət əmlakının külli miqdarda mənimsənilməsi ilə bağlı bir sıra cinayət işləri üzrə istintaq yekunlaşıb və günahkar şəxslər cinayət məsuliyyətinə cəlb edilib. Törədilmiş cinayətlər nəticəsində hüquqi və fiziki şəxslərə dəymiş maddi ziyanın 82,3%-nin istintaq dövründə ödənilməsi təmin olunub. Hərbi prokurorluq orqanlarının əməliyyat-axtarış tədbirləri nəticəsində axtarışda olanlardan 34 nəfər istintaqa cəlb edilib.

Təhqiqat orqanları qanunların icrasına dair 63 yoxlama keçirib, nəticədə 1064 qanun pozuntusu aşkar edilib. Qanun pozuntularını doğuran səbəb və şəraitin aradan qaldırılması üçün 98 təqdimat göndərilib, 125 nəfərə xəbərdarlıq edilib, 30 cinayət işi başlanıb, 76 yazılı göstəriş verilib, 203 nəfər intizam məsuliyyətinə cəlb edilib.

Dövlət ittihamının müdafiəsi şöbəsi tərəfindən birinci instansiya məhkəmələrinin hökm və  qərarlarından verilmiş 20 apellyasiya protestinin 46,2%-i təmin olunub.

Cari ilin I yarısında hərbi prokurorluq orqanları vətəndaşların 793 müraciətinə baxıb, 428 vətəndaş mərkəzi aparatda qəbul edilib, ərazi hərbi prokurorluğunda 1491 vətəndaşın fərdi qəbulu aparılıb, hərbi hissə və birləşmələrdə isə 1206 nəfər qəbul edilərək, müraciətləri üzrə müvafiq qərarlar verilib. -05D-