Hesabat: Parlamentdə müzakirələr alternativsiz keçirilir

Bakı/09.06.22/Turan: Cümə axşamı “Meclis.info" parlamentin monitorinq platforması “Milli Məclisin fəaliyyəti haqqında ümumi hesabat”ı təqdim edib.

Platforma qanunvericilik fəaliyyəti, prosedurlar, qanunvericilik və icra hakimiyyəti orqanları arasında münasibətlərin, vətəndaş cəmiyyətilə əməkdaşlığın monitorinqini aparır.

Hesabata bəzi statistik məlumatlar da daxildir.

Belə ki, Milli Məclisin 118 deputatından 96-ı (81 faiz) kişi, 22-i (19 faiz) qadındır.

Milli Məclisin sədri qadın olsa da, parlamentin 15 komitəsindən cəmi 2-nin sədri qadındır.

“Qanunvericilik hakimiyyətində kişilərin mütləq dominantlığı yalnız bu hakimiyyət qolunun özündə deyil, bütövlükdə ölkənin ictimai-siyasi həyatında qadınların təmsilçiliyinə əhəmiyyətli dərəcədə mənfi təsir göstərir”, - hesabatda qeyd olunur.

İclasların stenoqramlarının təhlili göstərir ki, qanun layihələri demokratik parlamentlər üçün səciyyəvi olan alternativ fikirlər ifadə olunmadan müzakirə edilir və qanun layihələri demək olar ki, heç bir müxalif mövqe ilə qarşılaşmır.

Parlament komitələri və ya işçi qrupları tərəfindən qanun layihələri və digər sənədlərin hazırlanması ilə bağlı ictimaiyyətə məlumat vermirlər. Yalnız qanun layihəsi tam hazır olduqdan sonra mətn Milli Məclisin rəsmi saytında yerləşdirilir ki, bu da ictimaiyyətdən gələn təkliflərin qanun layihələrinin hazırlanması prosesində nəzərə alınmasının qarşısını alır.

Hesabatda qeyd olunur ki, Milli Məclis deputatlarının orta yaş həddi 55-dir. Ən yaşlı deputat  Ziyad Səmədzadənin 81, ən gənc deputat Səbinə Xasayevanın  28 yaşı var.

Hesabatda deputatların mediaya açıqlığı, aktivliyi və digər məsələlər də qeyd olunub.

Parlamentin “Meclis.info” monitorinq platforması bir qrup vətəndaş fəalının ictimai təşəbbüsüdür. -21D06-