Heydər Əliyev Mərkəzində baş verən yanğınla bağlı istintaq davam edir

İyulun 20-də Heydər Əliyev Mərkəzində baş vermiş yanğınla bağlı Baş Prokurorluğun Ağır Cinayətlərə dair İşlər üzrə İstintaq İdarəsində Cinayət Məcəlləsinin 225.2-ci (ağır nəticələrə səbəb olmaqla yanğın təhlükəsizliyi qaydalarını pozma) maddəsi ilə başlanmış cinayət işinin istintaqı davam etdirilir.

Baş Prokurorluğun mətbuat xidmətindən Turan-a bildirilib ki, istintaqın gedişi ilə bağlı hələ açıqlama verilməsi nəzərdə tutulmur. 

Xatırladaq ki, yanğından sonra  cinayət əməllərinə görə “DİA Holdinq” şirkətinin mühəndisi Kaya Ümit Ruşen İhsan oğlu, “Treysan” firmasının qaynaqçısı Karahan Ömər Şərif Ömər oğlu və “Treysan” firmasının iş icraçısı (iş formeni)  Şimşək Vedat Halit oğlu təqsirləndirilən şəxs qismində cəlb olunaraq Cinayət Məcəlləsinin 225.2-ci maddəsində nəzərdə tutulan ittiham elan edilməklə barələrində məhkəmənin qərarları ilə həbs qətimkan tədbiri seçilib.

İstintaq müəyyən edib ki, DİA Holdinq” şirkətinin üzərinə yanğın təhlükəsizliyi qaydalarına riayət edilməsi vəzifəsi qoyulmuş əməkdaşları iyulun 19-da və 20-də mərkəzin muzey hissəsinin tavan örtüyündə panel lövhələrinin bir-birinə metal konstruksiyalı xüsusi detallarla bərkidilib tənzimlənməsi işlərinin yerinə yetirilməsi zamanı yanğın baş verməsi və yayılması imkanlarının qarşısının alınmasının təmin edilməsi üçün müəyyən olunmuş yanğın təhlükəsizliyi qaydalarını lazımi səviyyədə təşkil etməyiblər.

Heydər Əliyev Mərkəzi bu il mayın 10-da açılıb. Mərkəzin açılışında prezident ilham Əliyev iştirak edib.

Heydər Əliyev Mərkəzi Heydər Əliyev prospektində inşa edilib. Mərkəzin memarı dünyada bir çox məşhur binaların memarı olan Zaha Hadiddir. Tikinti 2007-ci ildə başlanıb.-03B-