Heydər Əliyev Mərkəzində baş vermiş yanğın demək olar ki, söndürülüb (VIDEO)

Saat 13.15-ə yaxın Heydər Əliyev Mərkəzində yanğın söndürülüb. Bu barədə Turan-ın hadisə yerində olan müxbiri məlumat verib. Közərən ocaqların alışmasına yol verməmək üçün vertolyotlar havadan tonlarla su atılmasını davam etdirirlər. Lakin güclü külək yanğınsöndürən aviatorların işini çətinləşdirir.

    Bir qrup yanğınsöndürən isə binanın damına qalxaraq yanmış örtükləri götürür. Binanın içərisində olan işçilərin sözlərinə görə, yanğın  binanın damında elektrik şəbəkəsində yaranan qısa qapanma nəticəsində baş verib.

    İlkin məlumatlara görə, yanğın nəticəsində xəsarət alan yoxdur. Yanğının səbəblərinin araşdırılması üçün FHN ekspertləri hadisə yerinə gəliblər. Baş nazirin müavinləri Yaqub Eyyubov, Abid Şərifov, FHN rəhbəri Kəmaləddin Heydərov, nəqliyyat, səhiyyə nazirləri, DİN rəhbərinin müavinləri hadisə yerindədir. 

    Lakin rəsmi şəxslərdən heç kim baş verənləri şərh etmir.—03C06-- 

Heydər Əliyev Mərkəzinin söndürülməsinə vertolyotlar cəlb edilib

Saat 11.00-da Heydər Əliyev Mərkəzinin damında başlayan yanğın onlarla yanğınsöndürən maşın tərəfindən  lokallaşdırılıb. Turan-ın müxbirinin hadisə yerindən verdiyi məlumata görə, alovun söndürülməsinə vertolyotlar da cəlb olunub. Binaya gedən bütün yollar bağlanıb, hadisə yerinə təcili yardım maşınları gəlib. Ətraf binaların sakinləri evlərini tərk ediblər. Binanın memarlıq işinin mürəkkəbliyi və hündürlüyü səbəbindən alovun söndürülməsi çətinləşib.  

    Ətraf evlərin sakinləri bildiriblər ki, alov binanın damından başlayıb və bir neçə km. məsafədə görünüb. Bundan sonra qara qatı tüstü əmələ gəlib və binanı bürüyüb.

    Yanğın söndürülərkən binanın daxilinə də ziyan dəyib. Belə ki, binaya  tonlarla su vurulub. Alovun söndürülməsi davam edir və nə qədər çəkəcəyini söyləmək mümkün deyil. Rəsmi şəxslər yanğının səbəbləri barədə açıqlama vermirlər.

    ** Heydər Əliyev Mərkəzi “Eurovision” mahnı müsabiqəsi ərəfəsində açılıb. Bina eyniadlı prospektdə keçmiş Səttarxan adına zavodun ərazisində inşa edilib. Mərkəzin inşasına 2007-ci ildə başlanılıb. Layihənin müəllifi tanınmış britaniyalı memar Zaha Hadiddir. Üç birləşmiş hissədən ibarət olan Mərkəz dalğanı xatırladır. Mərkəzin ərazisində park salınıb. Hakimiyyətin fikrincə, bu memarlıq abidəsi inkişaf edən Azərbaycanın rəmzi olmalıdır.

    Mərkəz böyük zaldan, konfrans zallarından, kitabxana və digər otaqlardan ibarətdir. Obyektin ümumi sahəsi 90 min kv. metrdən çoxdur. 

    Mərkəzdə elmi araşdırmaların, konfransların, simpoziumların, mədəni tədbirlərin keçirilməsi nəzərdə tutulur

    Hakimiyyət layihənin qiymətini gizlətmir. Ekspertlərin hesablamalarına görə, ətrafdakı beş yaşayış binasının söküntüsü, parkın inşası nəzərə alınmaqla ən azı 300 mln. manat sərf olunub. 

    Qeyd edək ki, layihənin müəllifi Zaha Hadid Avropada ən tanınmış müasir memarlardan biridir. 1950-ci ildə İraqda anadan olub və sonralar Böyük Britaniyaya köçüb. 2004-cü ildə memarlıq sahəsindəki uğurlarına görə Pritsker mükafatına layiq görülüb. 

    Onun işləri arasında Madriddə Puerta Amerika oteli, Leypsiqdə BMW zavodunun mərkəzi binası, Kopenhagendə İncəsənət Muzeyi, Sinsinatidə Müasir İncəsənət Mərkəzi və digərləri var.-06D—

Heydər Əliyev Mərkəzi yanır

Bakının Heydər Əliyev prospektində yerləşən Heydər Əliyev Mərkəsində güclü yanğın baş verib. Yanğının səbəbləri məlum deyil. Bina bu yaxınlarda tanınmış britaniyalı memar Hadidin layihəsi əsasında tikilib.

  Şahidlərin sözlərinə görə, alov göyə yüksəlir, ətraf ərazi qara tüstüyə bürünüb. -0--0-