SOCAR: İsveçrədəki şirkətlər ayrı-ayrı şəxslərə məxsus deyil

SOCAR (Dövlət Neft Şirkəti) Avropada azərbaycanlı siyasi mühacirlər təşkilatının dünən yaydığı məlumatı təkzib edib.

    Məlumatda İsveçrədə “SOCAR” adı altında qeydiyyatdan keçmiş üç şirkətin ayrı-ayrı şəxslər, o cümlədən SOCAR prezidenti tərəfindən təsis edildiyi iddia olunurdu.

    SOCAR-ın məlumatında isə deyilir ki, SOCAR Trading SA 2007-ci ilin dekabrında Cenevrədə Azərbaycan neftinin dünya bazarına müstəqil şəkildə çıxarılması və ixracın çevikliyinin təmin edilməsi məqsədilə təsis edilib.

    “SOCAR Trading SA” şirkətinin təsisçisi “Supra Holding Limited” şirkətidir ki, burada da ARDNŞ-nin əvvəllər 50 faiz payı olub, hazırda isə şirkət 80 faiz payın sahibidir.     

    Nə ”SOCAR Trading SA” şirkətinin, nə də onun təsisçisi olan “Supra Holding Limited” şirkətinin

təsisçiləri arasında fiziki şəxs yoxdur və heç vaxt olmayıb.

    Şirkəti təsisçiləri kimi qələmə verilən fiziki şəxslər idarə heyətinin üzvləridir. Onların bir qismi SOCAR Trading SA-da, digərləri isə SOCAR-ın özündə yüksək vəzifə sahibləridir.

    SOCAR Trading SA-nın baş direktor müavini Zaur Qəhrəmanova gəlincə, o, ümumiyyətlə şirkətin idarə heyətinin üzvü deyil.

    SOCAR Black Sea-yə gəlincə, o, “SOCAR Trading SA” şirkətinin və Ukraynanın “ROSSİM” şirkətinin neft məhsullarının ixracı məqsədilə yaradılıb.

    Nəhayət, üçüncü şirkət SOCAR-ın Amerikanın “Exxon Mobile” şirkətinin İsveçrə bölməsi olan “Esslo Schweiz GmbH”nin səhmlərinə sahib olması ilə əlaqədar təsis edilib. Alınmış YDM ərazisində yerləşən mağazaların idarə edilməsi məqsədilə qida məhsullarının pərakəndə satışı üzrə dünyada məşhur olan “Migros” şirkəti ilə alyans müqaviləsi imzalanıb. -06D-