Şahidlər Mirabad Rzayevin həbsi ilə bağlı rəsmi versiyaya şübhə edir

Şahidlər Baş Prokurorluğun iyulun 13-də Saatlı rayonunun Novruzlu kənd sakini Mirabad Rzayevin və oğlu Mirsalehin həbsinin əsaslı olması barədə bəyanatına şübhə edirlər.

    Rəsmi məlumata əsasən, Mirabad Rzayev rayon icra hakimi Sirağaddin Cabbarova hücum edib və onun pencəyini cırıb. Rzayev həbs edilib və barəsində 315.1-ci (hakimiyyət nümayəndəsinə qarşı güc tətbiq etmə) maddə ilə cinayət işi açılıb, oğlu isə xuliqanlığa görə 10 günlük həbs cəzası alıb.

    Lakin şahidlər iddia edirlər ki, həmin gün icra hakimiyyətində 2010-cu il daşqınından ziyan çəkənlərin rayon rəhbərliyi ilə görüşü keçirilib.

    Mirsaleh Rzayev söz alaraq, rayon icra başçısına hakimiyyət yardım etməyə söz versə də, zərərçəkmişlər üçün ev tikilməməsindən, insanların işsiz qalmasından şikayət edib. Buna cavabda Cabbarov polisə şikayətçini həbs etmək göstərişi verib. Atası oğlunu müdafiə edib.

    Görüş başa çatdıqdan sonra ata və oğul Rzayevlər akt zalının qəbul otağına dəvət ediliblər və buradaca həbs olunublar. Görüş iştirakçıları otaqda nə baş verdiyini görməyiblər. Sirağaddin Cabbarov özü və tabeliyində olan şəxslər kobudluqları ilə məşhurdurlar. Belə hadisələrdən biri 1 sentyabr 2010-cu ildə baş verib, o və iki müavini – Rahib Salahov və Ağa Əsədov şikayət üçün icra hakimiyyətinə gələn Dəllər kəndinin bir neçə sakinini döyüblər. 

    Onlar, xüsusilə Dəllər kənd icmasının rəhbəri Lazım Ümidov yüzlərlə insanın gözü önündə icra hakimiyyətinin binası qarşısında döyülüblər. O və daha dörd nəfər Cabbarovun göstərişi ilə həbs ediliblər, lakin elə həmin gün Prezident Administrasiyasının müdaxiləsindən sonra sərbəst buraxılıblar.

    Cabbarov Bakıya çağırılıb, onun müavinləri isə növbəti gün kəndə gələrək təhqir etdikləri üçün kənd sakinlərindən üzr istəyiblər. Daşqın problemləri ilə məşğul olan “Kür” vətəndaş cəmiyyəti qərargahı Saatlı rayonunda da buna bənzər hadisələr qeydə alıb. -0-