Hökumət sığorta pullarını niyə ödəmək istəmir?

Ehtiyatda və İstefada olan Zabitlər Birliyi (EİOZB) şəhid və itkin düşən əsgərlərin varislərinə sığorta pullarının ödənilməməsilə bağlı “dəyirmi masa” keçirib.

Birliyin rəhbəri Yaşar Cəfərli bu sığorta pullarının hər əsgərə görə 11 min manat təşkil etdiyini bildirib. Əsasən 1992-97-ci illərdə şəhid və itkin düşən əsgəri kateqoriyanın varislərini əhatə edir. Y.Cəfərli bu kontingentin probelminin bununla başa çatmadığını, mənzil, təhsil, tibbi müayinə kimi problemlər yaşadıqları nəzərə çatdırılıb.

2009-cu ildən Birlik bu kateqoriya vətəndaşların haqlarını təmin etmək üçün yollar arayıb. Nəhayət, ictimai birlik məsələni məhkəmə müstəvisinə çıxarıb. 

“Dəyirmi masa”da 1992-97-ci illərdə şəhid olan və itkin düşənlərin sayı barədə açıqlama verilməyib. Amma 2010-cu ildə ölkə məhkəmələrində bu sığorta pullarının ödənməsilə bağlı 38 məhkəmə qətnaməsi çıxarılıb və qətnamələr icra edilib. Ona görə də 2010-cu ili bu baxımdan sığorta pullarının qaytarılması ili adlandırmaq olar. Son vaxtlar bu sahədə yenə də problemlər yaşanmağa başlanılıb. Belə ki, sığorta pullarının verilməsində problemlər yaradılır, sığorta idarələri pulun verilməməsinə görə Maliyyə Nazirliyini, Maliyyə Nazirliyi isə sığorta idarəsini günahkar bilir. Məhkəmələrə isə bu tipli iddiaları qəbul etməmək, sorğularını cavablandırmamaq tapşırığı verildiyi iddia olunur. Valideynlərdən bir neçəsi problemlərinin həlli üçün Maliyyə Nazirliyinə müraciət etdikdə nazirlik vətəndaşlara ictimai birliklə əlaqə saxlamamaq tövsiyəsi verib. Bundan əlavə, ictimai birliyi təxribatda ittiham edirlər. 

Y.Cəfərli pulun verilməsində yaranan fasiləyə görə ölkə iqtidarını siyasi iradəyə malik olmamaqda, Maliyyə Nazirliyi və sığorta şirkətini isə məmur özbaşınalığında ittiham edib. Bugünkü “dəyirmi masa”ya ombudsman aparatının, Maliyyə Nazilriyi və sığorta idarəsinin təmsilçiləri dəvət olunsa da tədbirə qatılmayıblar. İctimai birlik bu məsələni Avropa məhkəməsinə belə daşımağa qədər mübarizə aparacağını bəyan edib.-05C-