Hüquq müdafiəçisi vəkilləri müdafiə işini yetərli qurmamaqda ittiham edir

Qubanın Rustov kəndində həbsə alınan 3 sakin MTN təcridxanasında saxlanılır. Bu haqda Turan-a hüquq müdafiəçisi Avtandil Məmmədov bildirib.

O, Nizami Nəcəfov və Vəfanur Məmmədovun yanvarın 7-dən 8-nə keçən gecə, V.Məmmədovun qardaşı Vəfadar Məmədovun isə yanvarın 9-da Qubada atasının məhkəmə prosesinə gedərkən məhkəmə binası önündə saxlanıldığını qeyd edib.

Hər üç şəxsə qarşı Cinayət Məcəlləsinin qanunsuz silah saxlamaq maddəsilə ittiham irəli sürülüb. Bu şəxslərə dövlət tərəfindən vəkillər təyin edilib. 

A.Məmmədov vəkilləri müttəhimlərin hüquqlarını yetərincə müdafiə edə bilməməkdə və müdafiə işini təşkil edə bilməməkdə ittiham edib.

İstintaq altında olduqları əsas gətirilərək, ailə üzvlərilə görüşə imkan verilmir. 

A.Məmmədov Vəfadar Məmmədova qarşı silah saxlamaq ittihamını inandırıcı saymır. “Gecəni bizim evdə qalmışıq, səhər Vəfadar atasının məhkəmə prosesinə gedib, orada da həbsə alınıb, ona görə deyirəm ki, bu ittiham əsaslı görünmür”, - deyə hüquq müdafiəçisi şübhələndiyi məqama aydınlıq gətirib.

Nizami Nəcəfov və Vəfanur Məmmədovun sələfi cərəyanına mənsub olduğunu deyən A.Məmmədov Vəfadar Məmmədovun dindən uzaq adam olduğunu bildirib.

A.Məmmədovun fikrincə, Vəfadar Məmmədovun həbsinə yeganə səbəb sosial şəbəkələr vasitəsilə qardaşının həbsi barədə məlumat yayaraq, onu ictimailəşdirməsidir.

“Bəzi məsələlər var ki, istintaq getdiyi üçün hələ bəlli deyil, yəqin ki, zamanla qaranlıq qalan məsələlər də bəlli olar”, - deyə hüquq müdafiəçisi qeyd edib. -05B-