Hüquq müdafiəçisinin xanımı məmuru təkzib edir

“Salyan rayon icra başçısının müavini Rəşad Cəbrayılovun “Yeni Müsavat” qəzetindəki açıqlamasına etirazımı ifadə edirəm”. Bu sözləri hədə-qorxu ilə rüşvət tələb etməkdə ittiham olunaraq həbsə alınan, Salyanda fəaliyyət göstərən “Demokratiyaya Yardım” ictimai birliyinin sədri Emil Məmmədovun xanımı Sənubər Məmmədova Turan-a bildirib.

S.Məmmədova E.Məmmədovun idarələrdən pul yığmadığını, bu tərbiyənin yiyəsi olmadığını rayon rəhbərliyinin də bildiyini nəzərə çatdırır. Həyat yoldaşının həbsinin keçən ilin dekabr, bu ilin yanvar-fevral aylarında dövlət başçısına, PA-nın rəhbəri Ramiz Mehdiyevə göndərdiyi müraciətlərlə bağlı olduğu qeyd edilir. Rayondakı rüşvət və korrupsiya faktları ilə bağlı ölkə rəhbərliyinə müraciətdən sonra rayon rəhbərliyinin E.Məmmədova qarşı şər-böhtan kampaniyası başladığı nəzərə çatdırılır. S.Məmmədova bu kampaniyaya rayon icra başçısı Tahir Kərimovun rəvac verdiyini iddia edir.

“Xahiş edirəm ki, E.Məmmədovun dekabr-fevral ayındakı məktublarını saytınızda dərc edin, çünki bu sənədlərdə haqqında danışdığım faktlar və Emilin üzünə duran məmurların adları var, həm də R.Cəbrayılov görsün ki, kim-kimə şər atır”, - deyə S.Məmmədova həyat yoldaşının mövqeyini müdafiə edir.

S.Məmmədova müraciətində qeyd edir ki, birliyin üzvü Tofiq Qasımov qohumu olan şəxs barəsində yazı yazdığı üçün regional mərkəzin rəhbəri Elçin Əzizovla söhbətə gedərkən E.Əzizovun oğlu Orxan Əzizov tərəfindən döyülüb. Hər iki şəxs polisə aparılıb, zorakılığa məruz qalmasına baxmayaraq, T.Qasımov saxlanılıb, cinayət törədən O.Əzizov sərbəst buraxılıb. Bu il aprelin 4-də saxlanılan T.Qasımovun E.Məmmədovun sədri olduğu ictimai birliyin üvzu olduğu ortaya çıxır. Bundan sonra T.Qasımovdan E.Məmmədov əleyhinə istifadə olunur. Rayonun büdcə təşkilatlarının rəhbərləri E.Məmmədovun hədə-qorxu ilə rüşvət tələb etməsi haqda polis şöbəsində ifadə verirlər. “Yenə də bildirirəm ki, bunlar hamısı həyat yoldaşıma qarşı Tahir Kərimovun atdığı şər-böhtandır”, - deyə S.Məmmədova rayon icra başçısnı ittiham edir.

E.Məmmədovun hədə-qorxu ilə rüşvət tələb etməsi haqda ifadə verən rayon telekommunikasiya şöbəsinin müdiri Faiq Nəcəfovun icra başçısının yaxın qohumu olduğu deyilir. E.Məmmədovun müraciətində bu şəxsin rayonun idarə və müəssisələrindən pul yığması əksini tapır. Müraciətdə F.Nəcəfov və E.Əzizovun indiyə kimi də idarə və müəssisələrdən şantaj yolu ilə pul yığdığı qeyd edilir.  

“Mənim R.Cəbrayılova sualım var, fakt istəyirsə, göndərdiyim məktubları oxusun, başqa faktlar da göndərməyə hazıram”, - deyə S.Məmmədova bildirir.

Daxili İşlər Nazirliyinin E.Məmmədovla bağlı açıqlamasını S.Məmmədova əsassız sayır. T.Kərimovun E.Məmmədova qarşı antikampaniya aparması haqda həyat yoldaşının aidiyyatı qurumlara dəfələrlə müraciətlər ünvanladığını xatırladıb. Həmin sənədlərdə E.Məmmədov rayondakı korrupsiya faktları ilə bağlı ölkə rəhbərliyinə müraciətlər göndərdikdən sonra rayon icra başçısının hədələrinə məruz qaldığını nəzərə çatdırır.

S.Məmmədova qeyd edir ki, T.Qasımov Bakı təcridxanasına göndərildikdən sonra əmisinə zəng edərək vəkil tutmasını, E.Məmmədovun əleyhinə ifadə verdiyi üçün ondan üzr istəməsini xahiş edib. 

S.Məmmədova daxili maliyyə yeyintiləri ilə bağlı faktları E.Məmmədova rayon maliyyə şöbəsinin müdiri Mahir Kərimovun verdiyini və bu yeyintilərin üstünün açılacağı halda həbs olunacağını söyləyib.

Son olaraq, S.Məmmədova Daxili İşlər Nazirliyinə müraciət edərək, E.Məmmədovun ünvanladığı bütün müraciətləri araşdırmağı xahiş edir. -05B-