Hüquq-mühafizə orqanları bir qrup sahibkarın həbsi barədə məlumatı şərh etmir

DİN və prokurorluq kreditlər üzrə borclarını qaytarmayan bir qrup sahibkarın həbsi barədə bəzi KİV-də yayılan məlumatları şərh etmirlər. Öncə bu barədə Virtualaz.org  saytı DİN-dəki mənbələrə isnadən məlumat yayıb. Lakin Turan agentliyinin sorğusunu DİN mətbuat xidməti nə təsdiq, nə də təkzib edib. Baş Prokurorluğun da reaksiyası eyni olub.

Qeyri-rəsmi məlumatlara görə, söhbət vaxtilə Azərbaycan Beynəlxalq Bankından (Cahangir Hacıyevin rəhbər olduğu vaxtlar) böyük məbləğdə kredit götürüb lakin pulları qaytarmayan onlarla adamdan gedir. Həmin sahibkarlar saxlanılıb və DİN Baş Mütəşəkkil Cinayətkarlığa Qarşı Mübarizə İdarəsinə aparılıblar.

Müşahidəçilər hesab edirlər ki, söhbət həbsdən deyil, kreditlərin qaytarılması tələbindən gedir. Görünür, C.Hacıyevin vaxtında borclular özlərini çox rahat hiss edirmişlər, lakin bank rəhbərliyi dəyişdikdən sonra borcların ödənilməsi tələb olunub.

Ola bilsin ki, pullar qaytarıldıqdan sonra saxlanılanlar buraxılsın və cinayət işi olmasın. Bunun nə qədər real olduğunu yaxın gələcək göstərəcək.

Qeyd edək ki, bu, son günlərin ilk korrupsiya qalmaqalı deyil. Belə ki, Dövlət Bayraq İdarəsinin direktoru Rəşad Məmmədov vəzifəsindən çıxarılıb. Rəsmi səbəb açıqlanmayıb. Lakin qeyri-rəsmi məlumatlara görə, o və tərəfdaşları müxtəlif obyektlərin yenidən qurulması və inşası üzrə işlərin aparılması zamanı külli miqdarda mənimsəməyə yol veriblər.

Təsdiqlənməmiş məlumatlara görə, o, məsuliyyətə cəlb olunub.-02В-