İbrahim Musayev: Mənə Turac Zeynalovun ailə üzvünü öldürməyi tapşırmışdılar

İbrahim Musayev adlı şəxs Turan agentliyinə telefonla sensasiya doğuran etiraflar edib. Musayev ona 2011-ci ildə Naxçıvan MTN-də işgəncədən ölən Naxçıvan sakini Turac Zeynalovun ailəsinin etibarını qazanmaq tapşırıldığını iddia edir.

Musayev ailə üzvlərini narkotiklə bağlı qanunsuz əməliyyatlara cəlb etməli və onları nüfuzdan salmalı idi. Bu şantajın məqsədi MTN-in ailəni hüquq müdafiə təşkilatlarına Turac Zeynalovun qətli ilə bağlı şikayətlərini geri almağa məcbur etmək cəhdi idi.

Musayevə tapşırığın yerinə yetirildiyi müddət üçün MTN əməkdaşının saxta vəsiqəsi verilib. Birinci tapşırıq yerinə yetirildikdən sonra ona Zeynalovun ailə üzvünü öldürmək tapşırılıb.

“Mən bunu edə bilməzdim və həyat yoldaşımla birlikdə Naxçıvandan qaçmağı qərara aldım. Bu qərara ona görə gəldim ki, mənə MTN əməkdaşının saxta sənədlərinin verildiyini bilirdim. Bu o demək idi ki, mənim özümü aradan qaldıra və işi narkotik alverçilərinin kriminal hesablaşması kimi təqdim edə bilərdilər”, deyə Musayev bildirib.

O qeyd edib ki, Rusiya şəhərlərindən birində gizlənir və həbs ediləcəyindən və Azərbaycan hakimiyyətinə təhvil veriləcəyindən ehtiyatlanır.

“Buna görə beynəlxalq hüquq müdafiə təşkilatlarına müraciət etdim və onlardan təhlükəsizliyimi təmin etməyi xahiş edirəm”, deyə Musayev bildirib.

Qeyd edək ki, Musayevin sözlərini sentyabrın sonlarında Turac Zeynalovun həyat yoldaşından Turan agentliyinə daxil olmuş məktub da dolayısıyla təsdiq edir. Zeynalovun həyat yoldaşı internetdən ona istinad edilən bütün məlumatları yığışdırmağı tələb edirdi, “heç bir şikayəti olmadığını və artıq siyasətlə məşğul olmaq istəmədiyini” bildirirdi.

Öz növbəsində, Naxçıvan MTN bazar ertəsi bəyanatla çıxış edərək, Musayevin qurumla hər-hansı əlaqəsi olduğunu təkzib edib.

Musayevin yalançı və təxribatçı adlandıran MTN iddia edir ki, Musayev bütün bunları aldadaraq, borclarını qaytarmadığı Naxçıvan sakinlərindən xaricdə gizlənmək üçün uydurub.

Musayev kimi insanlar əhalinin dövlət hakimiyyəti orqanlarından narazılığına səbəb olmaq və sabitliyi pozmaq üçün daxili və xarici qüvvələrdən istifadə edir. “Lakin onlar buna nail olmayacaqlar”, deyə cəsur təhlükəsizlik orqanları vəd edir.

* Xatırladaq ki, Naxçıvan hava limanının işçisi Turac Zeynalov İran kəşfiyyatı ilə əməkdaşlıq ittihamı ilə həbs edilib və bir gün sonra Naxçıvan MTN-in təcridxanasında vəfat edib. Bu idarə ölümün onkoloji xəstəlik nəticəsində baş verdiyini bəyan edib, lakin mərhumun qohumları Zeynalovun dəfnindən videogörüntüləri mətbuata təqdim ediblər, bu görüntülərdən onun bədənində döyülmə və elektrik cərəyanı ilə işgəncə izləri açıq-aşkar görünür. -02/03В-