İctimai Komitə 1600 məhbusa hüquqi yardım göstərib

Ədliyyə Nazirliyi yanında İctimai Komitə 2006-cı ildən cəzaçəkmə yerlərinə 170 dəfə baş çəkib, 1600-dan çox məhbusa hüquqi yardım göstərib. Bu barədə İctimai Komitənin koordinatoru, parlamentin deputatı Çingiz Qənizadə bu gün Beynəlxalq Mətbuat Mərkəzində hesabat tədbirində bildirib.

İctimai Komitənin üzvləri həmçinin islah edilmiş məhbusların vaxtından əvvəl azadlığa buraxılması üzrə komissiyanın işinə də cəlb olunublar. 2900-ə yaxın məhbus ya vaxtından əvvəl şərti olaraq azadlığa buraxılıb, ya da yumşaq rejimli koloniyaya köçürülüb.

Eyni zamanda Ç.Qənizadə deyib ki, mühakimə olunanlar çox zaman ədalətsiz istintaq və hökmlərdən şikayət edirlər. “Hələlik İctimai Komitənin bu məsələlərə təsir etmək səlahiyyəti yoxdur”, - o qeyd edib.

QHT-lərə Dəstək Şurasının rəhbəri, deputat  Azay Quliyev ədalətsiz istintaqdan şikayət verilməsinin mümkünlüyünü qeyd edib.

Ədliyyə Nazirliyi İnsan Hüquqları İdarəsinin rəisi Faiq Qurbanov ictimai nəzarətin həyata keçirilməsində bu qurumun rolunu qeyd edib.

O deyib ki, əgər ilkin olaraq İctimai Komitə yalnız məhbusların saxlanma şəraitinin monitorinqi ilə məşğul olurdusa sonradan cəzaların yumşaldılması məsələsinin həllinə də cəlb edilib.

Tədbir zamanı Ədliyyə Nazirliyi yanında İctimai Komitənin  işinin təkmilləşdirilməsinə, QHT-lərin iştirakı ilə onun başqa qurumlarla əməkdaşlığına  dair fikir mübadiləsi aparılıb.—06C--