İlham Əliyev özünü yandıran veteranın ailəsinin problemlərini həll etməyi tapşırıb

Prezident İlham Əliyev müvafiq qurumlara dekabrın 25-də özünü yandıran Qarabağ müharibəsi əlili Zaur Həsənovun müalicəsini təmin etməyi tapşırıb. Bu barədə AzerTAc dövlət agentliyinə müsahibəsində Prezident Administrasiyasının ictimai-siyasi şöbəsinin rəhbəri Əli Həsənov bildirib.

Bununla belə, o qeyd edib ki, Z.Həsənovun kafesinin əlindən alınması haqqında məhkəmə qərarı ləğv edilə bilməz.

“Heç bir dövlət qurumu, o cümlədən ali icra hakimiyyəti başçısı – prezident hakimiyyətin başqa qolunun – məhkəmə hakimiyyətinin işlərinə müdaxilə edə və onun qərarlarını ləğv edə bilməz”, deyə Həsənov bildirib.

Onun sözlərinə görə, Z.Həsənovun kafesi Həmkarlar İttifaqları Konfederasiyasının “Kurort” SC-nin “Zığ” sanatoriyası ərazisində qanunsuz fəaliyyət göstərirdi və məhkəmə qərarı ilə sökülüb.

“Biz məhkəmənin qərarını dəyişə bilmərik”, deyə Əli Həsənov bildirib.

Bununla belə, Zaur Həsənovun müharibə veteranı və çoxuşaqlı ailənin başçısı olduğunu nəzərə alaraq, hər bir dövlət orqanı və ictimai təşkilat, ilk növbədə HİK veterana sosial problemlərinin həllində köməklik göstərməlidir, deyə Həsənov fikrini tamamlayıb. -16D04-