İlqar Məmmədov karserə salınıb (YENİLƏNİB)

REAL hərəkatının lideri, 2 saylı koloniyada cəza çəkən İlqar Məmmədov bu gün saat 17:00-a yaxın karserə salınıb.

Onun vəkili Fuad Ağayev Turan-a bildirib ki, cəzanın səbəbi məlum deyil. Lakin bunun İ.Məmmədovun koloniyada ona təzyiq göstərilməsi ilə bağlı mətbuata verdiyi bugünkü bəyanatla əlaqədar olması istisna edilmir.-03В-

2015 Avqust 14 (Cümə) 16:40:25

Respublikaçı Alternativ (REAL) Hərəkatının sədri İlqar Məmmədov həbsxanada təzyiqlərə məruz qalması ilə bağlı bəyanat yayıb.

O, həbsdə olduğu 2 il yarımdan  çox müddətdə Penitensiar Xidmət  əməkdaşlarının səlahiyyətlərini aşdıqlarını bildirir.  Xidmət əməkdaşları hər hansı əsas gətirmədən İ.Məmmədovu dəfələrlə “prezidentin adından və onun tapşırığı ilə” hədələyiblər. Hədənin məzmunu əfv ərizəsi yazmadığı halda həbsdən sağ-salamat çıxmayacağı formasında olub. İ.Məmmədov yaydığı bəyanatda bu hədəni xususilə polkovnik İmran Tağızadənin səsləndirdiyini vurğulayır. İ.Məmmədov bu haqda il yarım əvvəl məhkəmədəki son sözümdə açıqlama verdiyini xatırladır.

“Avropa məhkəməsi  müəyyən edib ki, məni həbs edərkən hakimiyyətin əsl məqsədi siyasi faəliyyətimə son qoymaq, susdurmaq olub”, - İ.Məmmədov qeyd edib. O bu amilləri nəzərə alaraq PX-nin hazırda həbsxanada bütün dustaqları keçirdiyi rentgen yoxlamasında iştirakdan imtina etdiyini nəzərə çatdırır.    

Rentgen şualanmasını təhlükəli sayan REAL sədri pis niyyətlə istifadə edildikdə sağlamlığa təhlükə yaratdığını deyir.  

Bundan öncə belə bir yoxlamadan imtina etdikdə heç bir problem yaşamadığını deyən siyasətçi imtina səbəbilə avqustun 14-də rəis müavini vəzifəsini icra edən Emin Həsənovun otağına çağırılıb. E.Həsənov İ.Məmmədovu rus dilində ən təhqiramiz ifadələrlə təhqir edib, bərk döydürməklə hədələyib. “Avropaya satılmış, sən şükür eləməlisən ki, səni vətən xaini kimi həbs etməyiblər”, - E.Həsənov İ.Məmmədovu vətənə xəyanətdə ittiham edib.

İ.Məmmədov təhdiddən doğan potensial risk qarşısında E.Həsənova etibarlı beynəlxalq ekspertlərin iştirakı ilə rentgen müayinəsindən keçməyə hazır olduğunu söyləyib. E. Həsənovsa İ.Məmmədova dustaqları əleyhinə qaldıracağı barədə hədə-qorxu gəlib.

Təhdidin gücləndiyini, bu təhdidin tək özü üçün yox, digər dustaqlar üçün də problem yaradacağını nəzərə alan İ.Məmmədov yaxşı tanıdığı bir neçə dustağın nəzarəti ilə müayinədən keçməyə hazı olduğunu deyib. Verdiyi təklifə cavab almayan İ.Məmmədov həbsxana rəhbərliyi tərəfindən son görüşdə də ünvanına təhdidlər eşidib, telefondan istifadə hüququ məhdudlaşdırılıb.

Sağlamlığı və təhlükəsizliyilə bağlı məsuliyyətin hökumətin üzərində olduğunu vurğulayan İ.Məmmədov bütün beynəlxalq və yerli qurumları təhlükəsizliyi ilə  bağlı məsələni diqqətdə saxlamağa çağırır.-05D-