İlqar Nəsibovun işi üzrə hazırlıq iclası keçirilib

Oktyabrın 24-də Naxçıvan Şəhər Məhkəməsində Mehman Allahverdiyevin sədrliyi ilə hüquq müdafiəçisi İlqar Nəsibovun işi üzrə hazırlıq iclası keçirilib.

İşə mahiyyəti üzrə baxılması noyabrın 4-nə təyin edilib. Bu barədə Turan-a İ.Nəcibovun xanımı, Naxçıvan Demokrtiya və İnsan Hüquqları Resurs Mərkəzinin rəhbəri Məlahət Nəsibova bildirib.

Xatırladaq ki, İ.Nəsibov avqustun 21-də Resurs Mərkəzinin ofisində Fərid Əsgərov və digər şəxslər tərəfindən vəhşicəsinə döyülüb. O, çoxsaylı sınıq və xəsarət alıb.

Hadisədən yalnız iki həftə sonra fakt üzrə 127.1 maddəsi (sağlamlığa qəsdən az ağır zərbə vurmaq) ilə cinayət işi başlayıb.

İ.Nəsibov bir neçə şəxs tərəfindən döyülsə də istintaqa yalnız Fərid Əsgərov cəlb olunub və o da qarşılıqlı iddia qaldırıb. Onun şikayəti üzrə hazırlıq iclası oktyabrın 27-də olacaq.

Qeyd edək ki, İ.Nəsibova ağır zərbələr vurmasına baxmayaraq, F.Əsgərov həbsə alınmayıb, polisin nəzarəti altındadır.

Həmçinin İ.Nəsibovun barəsində həbs qətimkan tədbiri seçilib. Bu səbəbdən də o, Bakıya müalicəyə gedə bilmir.

Havaların soyuması ilə əlaqədar İ.Nəsibovun vəziyyəti pisləşib. Üzündəki çoxsaylı sınıqlar çətinliklə bitişir. Bundan əlavə, üzünün sol hissəsi keyiyib.

İ.Nəsibovun yaxşı fizioterapiya seanslarına ehtiyacı var ki, bu da Bakl klinikalarnda mümkündür.

* İlqar və Məlahət Nəsibovlar Naxçıvanda hüquq-müdafiə və jurnalist fəaliyyəti ilə məşğul olurlar.

Yerli və beynəlxalq hüquq-müdafiə təşkilatları əmindir ki, İ.Nəsibovun amansızcasına döyülməsi onların hüquq-müdafə  fəaliyyəti ilə bağlıdır. Belə ki, uzun müddətdir ki, cütlük Naxçıvanda  insan hüquq və azadlıqlarının kobud şəkildə pozulmasını ifşa edirlər.-03B06-