İnformasiya sorğusu üzrə növbəti yubadılmış məhkəmə prosesi

Martın 31-də 1 saylı Bakı İnzibati-İqtisad Məhkəməsində Turan İnformasiya Agentliyinin direktoru Mehman Əliyevin Bakı Şəhər İcra Hakimiyyətinə qarşı iddiası üzrə məhkəmə iclası keçirilib.

İddia ərizəsinin predmeti “İnformasiya azadlığı haqqında” qanunun paytaxtın İcra Hakimiyyəti tərəfindən pozulmasıdır, konkret olaraq informasiya sorğusuna cavab verilməməsidir.

Cavabdehin nümayəndələri məhkəməyə gəlməyiblər.

Növbəti iclas bu il mayın 1-nə təyin edilib.

Hakim Elçin Məmmədov bildirib ki, agentliyin informasiya sorğusuna cavab verilməsi xahişilə Bakı Şəhər İcra Hakimiyyətinə məktub göndəriləcək.

İnformasiya sorğusu bu il yanvarın 24-də Bakı Şəhər İcra Hakimiyyətinin başçısı Hacıbala Abutalıbovun adına göndərilib, iddia isə fevralın 23-də məhkəməyə təqdim edilib. Göründüyü kimi, iki aydan çoxdur ki, cavab yoxdur və mayın 1-dək olub-olmayacağı məlum deyil.

Jurnalistlərin dövlət strukturlarına informasiya sorğuları göndərməsi praktikası vəziyyətin acınacaqlı olduğunu və Azərbaycanda “İnformasiya azadlığı haqqında” qanunun işləmədiyini göstərir. Məsələn, bundan öncə “Azərsu” Dövlət Şirkətindən suallara cavab olmaq üçün 9 məhkəmə iclası keçirilib. İnformasiya sorğusu tam təmin edilməyib və iş Apellyasiya Məhkəməsinə keçib.

Bakı Şəhər İcra Hakimiyyətinə informasiya sorğusu Buzovna qəsəbəsi, Sübhi, 2 ünvanda yerləşən 8 və 9-cu mərtəbələrdəki mənzillərlə bağlı olub. Belə ki, 2016-cı il dekabrın 18-də yanğın zamanı həmin mənzillərə ziyan dəyib. Bina Bakı Şəhər İcra Hakimiyyəti Mənzil-Kommunal Təsərrüfat Departamentinin 1 saylı Xüsusi Mənzil-Kommunal Təsərrüfat Birliyinin tabeliyindədir.

Son məlumatlara görə, yanğın zamanı ziyan dəymiş binanın üzlüyü tökülür və bu, ətrafdan keçənlərin həyatına təhlükə yaradır.—0—