ATƏT sədri: Qarabağda aprel qarşıdurması 20 ilin ən pis insidentidir

ATƏT-in fəaliyyətdə olan sədri, Avstriya xarici işlər naziri Sebastyan Kurts Qarabağda 2-4 aprel 2016-cı il hərbi əməliyyatlarının ildönümü ərəfəsində bəyanatla çıxış edib. 

“Bir il öncə müşahidə etdiyimiz savaş və zorakılıq son iki onilliyin ən qorxunc hadisələridir. Bu, dağıntılara, əzab-əziyyətə və insan itkisinə səbəb oldu. Bu, hərbi mexanizmin sülhə nail olunması üzrə səyləri sürətlə poza biləcəyinin xatırlatmasıdır.

Bununla əlaqədar biz bütün tərəfləri atəşkəs rejimini təhlükəyə atan istənilən əməllərdən çəkinməyə çağırırıq. Bütün tərəflər öz öhdəliklərini yerinə yetirməli və beynəlxalq humanitar öhdəliklərinə riayət etməlidirlər - hərbi cinayətlərə heç vaxt bəraət verilə bilməz", deyə Kurts bildirib.

O, danışıqlarda yeni təkan olacağına ümid etdiyini bildirib: "Diqqəti etimadın artırılması, habelə mahiyyəti üzrə danışıqların bərpa olunması üzrə praqmatik və praktiki addımlar üzərində cəmləşdirməyin vaxtı çatıb", deyə Kurts vurğulayıb.

Bu kontekstdə Kurts qurbanlar verilməsinin davam etməsi ilə bağlı təəssüfünü bildirib və zərərçəkmiş ailələrə başsağlığı verib.

"Bir il əvvəlki döyüş əməliyyatlarından sonrakı şok ermənilərin və azərbaycanlıların sülhə inanmasına mane olub, amma Dağlıq Qarabağ münaqişəsinin hərbi həlli yoxdur. Biz sülhü indi planlaşdırmalı və bütün dəhşətli nəticələri ilə müharibənin qayıtmasına yol verməməliyik", deyə Kurts əlavə edib.

Kurts həmçinin səfir Andjey Kasprşikin və onun komandasının işini yüksək qiymətləndirib, 2017-ci ilin fevralında həlak olmuş hərbiçilərin cəsədlərinin qaytarılması üçün BQXK-nin humanitar əməliyyatının həyata keçirilməsinə fəal yardım bunun sübutudur.

"ATƏT rəhbərliyi tərəflərin 2016-cı ildə Vyana və Sankt-Peterburq sammitlərində əldə olunmuş razılaşmaların bundan sonra da təşviqi və həyata keçirilməsi üzrə səylərinə töhfə verməyə hazırdır", deyə Kurts fikrini tamamlayıb. -02D-