İnsan hüquq və azadlıqlarının pozulması halları azalıb?

Daxili İşlər Nazirliyi bu günlərdə Bakı şəhər polis idarəsində əməliyyat müşavirəsi keçirib. 

Bakı Şəhər Baş Polis İdarəsinin rəisi, polis general-mayoru Rafiq Abbasov hesabat məruzəsilə çıxış edib. Hesabat dövründə paytaxtda 9.719 cinayət faktı qeydə alındığı, 79,1%-nin üstü açıldığı deyilib. Cinayətlərin 85,8%-i az ağır və böyük ictimai təhlükə törətməyən, 14,2%-i ağır və xüsusilə ağır növ cinayətlər olub. 

Cinayətlərdən 1.597 fakt yəni, 14,1% şəxsiyyət, 22,1%, mülkiyyət əleyhinə olanlar 16,1% azalıb. 

Ümumi cinayətlərin açılması 5,3%, ağır və xüsusilə ağır növlərinin açılması 7,9% yaxşılaşıb. Şəxsiyyət əleyhinə törədilən 2.468 cinayətdən 96,4%, o cümlədən, 69 qəsdən adamöldürmənin  94,9%  və  34 adam öldürməyə cəhdin hamısının üstü açılıb.  

65 soyğunçuluq və quldurluq törədən 122 nəfərdən ibarət 49 qrup, 117 mənzil oğurluğu törədən 74 nəfərdən ibarət 31 qrup zərərsizləşdirilib. Keçmiş illərdən bağlı qalan 252 cinayətin üstü açılıb. 

Narkotik vasitələrin qanunsuz dövriyyəsinə qarşı mübarizə çərçivəsində 2012-ci ildə 917 nəfər  məsuliyyətə cəlb olunub, 204 kiloqram narkotik vasitə götürülüb, 30 nəfərdən ibarət 14 qrup ifşa edilib. 

Daxili işlər naziri Ramil Usubov müşavirədə paytaxtın polis orqanlarının fəaliyyətini tərifləyib, əvvəlki illərlə müqayisədə son vaxtlar “insan hüquq və azadlıqlarının pozulması hallarının xeyli azaldığını” deyib. -05D-