Avropa Şurası Azərbaycanda korrupsiya ilə bağlı hesabat dərc edib

Sənəddə tövsityyələrdən altısının "qismən" icra olunduğu, dördünün isə "icra olunmadığı" yazılıb.

Azərbaycan üzrə Uyğunluq Hesabatının birinci hissəsi - "Kriminallaşdırma", ikinci hissəsi isə "Siyasi partiyaların maliyyələşməsində şəffaflıq" məsələlərinə baxır. İcra olunmayan dörd tövsiyyədən hər biri ikinci hissəyə - siyasi partiyalaların maliyyələşməsində şəffaflıq haqqında tövsiyyələrə aid olub.

Hesabatdan belə qənaətə gəlmək olar ki, GRECO-nu ən çox narahat edən çatışmazlıq dövlət tərəfindən maliyyə yardımının yalnız parlament seçkilərində etibarlı səslərin ən azı 3 faizini toplayan və ya Parlamentdə yer qazanan partiyaya ayrılması olub.

"GRECO xatırlatmaq istəyir ki, daha sərt şəffaflıq tələblərini özündə əks etdirən tövsiyyələr inzibati baxımdan zəif, kifayət qədər iş qüvvəsi və maliyyəyə malik olmayan partiyaların həmin qaydalara uyğunlaşmasına nail olması üçün lazımi resurslarla təmin olunması məqsədini daşıyır. Bu narahatçılığı aradan qaldırmaq təcili prioritet daşıyır", hesabatın Azərbaycanın Korrupsiyaya qarşı mübarizə komissiyasının saytında dərc olunmuş azərbaycanca mətnində qeyd olunur.

Ölkədəki siyasi vəziyyətə gəldikdə isə GRECO "həqiqi plüralist mühitin və rəqabətli seçki kampaniyalarının azlığı ilə bağlı narahatçılığını xatırlatmaq istəyir".

"... kriminallaşdırma ilə bağlı etdiyi dəyişiklərlə Azərbaycan bu sahədəki tövsiyyələrin icrasında məqbul səviyyəyə çatmışdır", hesabat yekunlaşdırır.

Lakin "Partiyaların maliyyələşdirilməsinin şəffaflığına dair ikinci mövzu üzrə verilmiş tövsiyələrin icra olunması üçün kifayət qədər məhdud addımlar atılıb və bu sahədə daha çox iş görülməlidir".

Qanun dəyişikləri

Hesabatın "Kriminallaşdırma" bölməsində verilən tövsiyyələrə cavab olaraq Azərbaycan höküməti Cinayət Məcəlləsinə edilən bir çox dəyişikləri təqdim edib.

Bu dəyişiklərdən biri - "aktiv və ya passiv rüşvətlə ələ alma cinayətində “təklif etmə”, “vəd vermə” və “təklif və ya vədin qəbul edilməsi” anlayışları daxil edilsin" tövsiyyəsi ilə əlaqədar olub.

Hökümət cavab olaraq 2011-ci ildə Cinayət Məcəlləsinin 311-ci və 312-ci maddələrinə edilən dəyişiklərdə bu anlayışların daxil edilməsini təsdiq edib. Beləliklə GRECO bu tövsiyənin "qənaətbəxş şəkildə icra olunması qənaətinə gəlmişdir".

Lakin bəzi qanun dəyişiklikləri kifayət olmayıb. GRECO-nun "Siyasi partiyaların maliyyələşməsində şəffaflıq" üzrə tövsiyyələrindən biri - "seçki kampaniyalarının və ümumilikdə siyasi partiyaların maliyyələşdirilməsinin şəffaflığına dair qaydaların pozulması ilə bağlı hüquqpozmaların dəqiq müəyyən edilməsi və həmin hüquqpozmalara görə təsirli, mütənasib və qarşısını alan cəzaların müəyyən edilməsini, xüsusilə mövcud cəza növlərinin artırılması yolu ilə" olub.

Hökümət Siyasi Partiyalar haqqında Qanuna (SPQ) yeni, "qanunun pozilmasına görə məsuliyyət" haqqında maddənin əlavə edilməsini qeyd edib.

Hökümət əlavə edib ki, Nazirlər Kabineti "üç ay müddətində SPQ-nun pozulmasına görə məsuliyyəti müəyyən edən qanun layihəsini təqdim etməlidir" və "bu cür qanun layihəsinin 2012-ci ilin payız aylarında Parlamentə təqdim edilməsi gözlənilir".

GRECO isə "hələ də Parlamentə təqdim edilməmiş bu qanun layihəsi belə tövsiyədə nəzərdə tutulan tələblərə cavab vermir" deyərək həmin tövsiyənin icra olunmadığı qənaətinə gəldiyini bildirib.

Hesabatın sonunda GRECO "ən geci 30 aprel 2014-cü ilədək" Azərbaycan nümayəndə heyətinin rəhbərini Kriminallaşdırma mövzusunda qismən icra olunan iki tövsiyyənin, Partiyaların maliyyələşdirilməsinin şəffaflığı mövzusunda isə icra olunmamış dörd tövsiyyənin icrası ilə bağlı "əlavə məlumatı təqdim etməyə dəvət etmişdir".