İntiqam Əliyevi işi üzrə prosesdə

Aprelin 7-də Hüquq Maarifçiliyi Cəmiyyətinin (HMC) rəhbəri İntiqam Əliyevin işi üzrə məhkəmə iclasında şahid Gülyanə Həbibova dindirilib.

O, üç ay ərzində HMC-də mühasib vəzifəsində işləyib. Həbibova bildirib ki, HMC fəaliyyətini qanunvericilik tələblərinə uyğun şəkildə həyata keçirirdi, donorlara maliyyə hesabatını isə o özü tərtib edir və göndərirdi.

Bundan sonra dövlət ittihamçısı vəkillər Anar Qasımlı, Əlaif Həsənov, Adil İsmayılov və Fariz Namazlının şahid qismində işə cəlb edilməsibarədə vəsatət qaldırıb.

Bu hüquqşünaslar Əliyevi müdafiəçisi olub, sonradan onlar eyni gündə kənarlaşdırılıblar və şahid qismində cəlb ediliblər.

Lakin hakim Rasim Sadıqov vəsatəti təmin etməyib.

Daha sonra müdafiə tərəfi HMC-nin keçmiş mühasibi Gülşən Orucovanın təqdimatı ilə HMC-nin vəsaitini başqa hesablara köçürən Azərbaycan Beynəlxalq Bankının 4 əməkdaşının əlavə şahid qismində məhkəməyə çağırılması haqqında vəsatət qaldırıb.

Bank əməkdaşlarının çağırılması zərurətinin yaranmasına səbəb müdafiə tərəfin ödəniş tapşırıqlarında Əliyevin imzalarının saxtalaşdırıldığı haqqında qənaəti olub. Məhkəmə bu vəsatəti təmin edib.

Zərərçəkmiş, HMC-nin keçmiş hüquqşünasi Sadiq Bağırov xətşünaslıq ekspertizası keçirilməsi haqqında vəsatət qaldırıb.

“İntiqam Əliyev deyir ki, sənədlərin altındakı onun imzası deyil. Qoy ekspertiza yoxlasın, əgər belədirsə, məndən zərərçəkmiş statusunu götürsünlər”, deyə Bağırov bildirib.

Müdafiə tərəfin etiraz etməyib, belə ki, bir müddət əvvəl özü ekspertiza aparılması haqqında vəsatət qaldırıb.

Lakin məhkəmə bu vəsatəti təmin etməyib.

Növbəti iclas 14 aprel saat 14:00-a təyin edilib.

** İntiqam Əliyev 8 avqust 2014-cü ildə qanunsuz sahibkarlıq, vergi ödənişindən yayınma və vəzifə səlahiyyətlərindən sui-istifadə ittihamı ilə həbs edilib. Sonradan o, mənimsəmə və saxtakarlıqda da ittiham edilib. Amnesty İnternational onu “vicdan məhbusu” kimi tanıyıb. -06C-