İntiqam Əliyevin səhhətində ciddi problemlər var

Həbsdə olan hüquq müdafiəçisi İntiqam Əliyevin tibbi müayinəsinin nəticələri məlum olub.

Onun qızı Nərmin Kamilsoy özünün Facebook səhifəsində yazıb ki, hüquq müdafiəçisində boyun osteoxondrozu və bel yırtığı xəstəliyi aşkar edilib. Lakin buna baxmayaraq ona təcridxana şəraitində ambulator müalicə yazılıb.

N.Kamilsoy oktyabrın 31-də təcridxanaya atasına baş çəkib. O qeyd edib ki, atası gümrah görünməyə çalışsa da ayaqda durmağa çətinlik çəkir.

İ.Əliyevin güclü baş ağrıları olur ki, bu da əsəb sisteminin pozulması və psixoloji gərginliklə əlaqədardır. O, sutkada cəmi 2-3 saat yatır və çoxlu sakitləşdirici dərmanlar qəbul edir.

Kamera soyuq olduğundan (təcridxanada istilik sistemi noyabrın 15-də veriləcək) hüquq müdafiəçisi tez-tez soyuqlayır.

Vəkillə görüşə getməzdən öncə onun qeydləri əvvəlkitək senzuradan keçirilir. Çox zaman qeydlər geri qaytarılmır.

Bununla belə hüquq müdafiəçisi ruhdan düşməməyə çalışır, dostlara, tanışlara, onu dəstəkləyənlərin hamısına salam və təşəkkürünü bildirir.

İ.Əliyev avqustun 8-də həbs olunub. O,  vergidən yayınmaqda, vəzifə səlahiyyətindən sui-istifadədə və qanunsuz sahibkarlıqda ittiham olunub.

İ.Əliyev bütün ittihamları rədd edərək onları siyasi motivli sayır.

Amnesty İnternational İ.Əliyevi “vicdan məhbusu” kimi tanıyıb..—06D--