İ.Qəmbər: Rasim Əliyevin ölümündə hakim rejim təqsirlidir

Aldığı xəsarətlərdən dünyasını dəyişən jurnalist Rasim Əliyev bazar günü Mehdiabad qəsəbəsindəki qəbirstanlıqda dəfn edilib.

Mərasimdə demokratik ictimaiyyətin çoxsaylı nümayəndələri – siyasətçilər, vətəndaş fəalları, jurnalistlər iştirak ediblər.

Əliyevin məzarı başında çıxış edən Milli Strateji Təfəkkür Mərkəzinin rəhbəri İsa Qəmbər bildirib ki, Rasim cəsur və istedadlı jurnalist idi.

“Aydındır ki, o, söz azadlığına görə həlak olub. Bu cinayətin arxasında kimin durmasından, həkimlərin səhvinin olub-olmamasından asılı olmayaraq, bir şey aydındır ki, Rasimin ölümündə özbaşınalığa səbəb olan, jurnalistlərə və ümumiyyətlə azad düşünən insanlara qarşı cinayətlərin törədilməsi üçün imkan yaradan rejim təqsirlidir. Qatillər qanun qarşısında cavab verməlidirlər. Amma vaxt gələcək, bu rejim də bu cinayətlərə görə cavab verəcək”, deyə Qəmbər bildirib.

Araşdırmaçı jurnalist Şahvələd Çobanoğlu bildirib ki, Əliyevin qətli ölkədə cinayətlərə, xüsusən jurnalistlərə qarşı cinayətlərə görə cəzasızlıq mühitinin nəticəsi olub. “Hamı elə hesab edir ki, jurnalistlərlə hakimiyyətin davrandığı kimi davranmaq olar. Belə bir fikir formalaşıb ki, müstəqil, müxalif jurnalistləri rahatca döymək olar. İnsanlar görəndə ki, polis jurnalistləri döyür və cəzasız qalır, onlar da mətbuata qarşı güc tətbiq etməyi mümkün sayır”, deyə Çobanoğlu bildirib.

Bu zaman o, ilkin versiyaya görə jurnalistə qarşı cinayəti futbolçunun qohumlarının törətdiyinə diqqət çəkib.

“Azərbaycan hakimiyyəti elan edib ki, ölkə idman dövlətidir və idmançılara imtiyazlar verib. Nəticədə belə alınır ki, onlar istədiklərini edə bilərlər. Rasim də bu sərbəstliyin qurbanı oldu”, deyə Çobanoğlu qeyd edib. -06D-