İranın qısamüddətli viza rejimi NMR ərazisində çaşqınlıq yaradır

Azərbaycanla İran arasında müvəqqəti viza rejimi tətbiq olunması İranla yaxın sərhəddə yerləşən Naxçıvan MR əhalisi arasında çaşqınlıq yaradıb. 

Turanın bölgə müxbirinin verdiyi məlumata görə, avqustun 6-da səhər saatlarından başlayaraq Naxçıvan şəhərindəki İİR konsulluq idarəsinin qarşısında xeyli sayda adam toplanıb. Bu adamlar əsasən Bakıdan Naxçıvana ailəli şəkildə gələn Azərbaycan vətəndaşlarıdır. 

Viza rejiminin Naxçıvandan Bakıya tranzit yolla gedən sərnişinlərə də şamil edilməsi gərginliyi daha da artırıb.

Sədərək sakini Təhməz Əhmədov Turanın müxbiri ilə söhbətində deyib: “... 80 km uzaqlıqdan yol gəlib saatlarla burada növbə gözləyirik. Kasıbçılıq ucbatından avtobusla Bakıya getmək məcburiyyətindəyik. İndi də viza məsələsi gediş-gəliş xərclərimizi bir az da artırdı”.

Xatırladaq ki, gün ərzində Naxçıvandan Bakıya tranzit yolla İran ərazisindən keçməklə 5-6 iritutumlu avtobus işləyir. Avtobus biletinin qiyməti bir adam üçün 14 manatdır. Bu qiymət təyyarə biletindən 3 dəfə ucuz olduğundan əhali daha çox avtobuslardan istifadə edir. Naxçıvan-Bakı təyyarə bileti isə 50 manatdır. -22/16B-