Məhəmmədrəsul Məcidov Azərbaycana daha bir Olimpiya medalı qazandırıb

Azərbaycan təmsilçisi Məhəmmədrəsul Məcidov London Olimpiadasında boks üzrə yarışların dörddə bir finalında (91 kq-dan artıq) rusiyalı Məhəmməd Ömərova qalib gələrək ən azı bürünc medalı təmin edib.  

Əslən dağıstanlı olan iki boksçunun döyüşü asan olmayıb. Birinci raund heç-heçə başa çatıb: 4:4. İkinci raundda Ömərov qalib gəlib: 7:6. Üçüncü həlledici raundda Məcidov fiziki baxımdan daha güclü olub və 7:3 hesabı ilə qalib gəlib. Yekunda Məcidov 17:14 hesabı ilə yarımfinala çıxış. Onun rəqibi italiyalı Roberto Kammarelli olacaq.

Xatırladaq ki, yarımfinala daha bir azərbaycanlı bokçu Teymur Məmmədov (91 kq.) da çıxıb. Yarımfinalda onun da rəqibi italiyalı Klemento Russo olacaq.

Bazar ertəsi start götürən güləşçilərimiz isə Olimpiadanı uğursuz başa vurublar.

60 kq. çəki dərəcəsində Həsən Əliyev yarımfinala çatsa da, bundan o yana gedə bilməyib. O, yarımfinalda uduzaraq bürünc medal almaq şansını da əldən verib və yekunda 5-ci yeri tutub.

Azərbaycan tərəfdən çıxış edən iranlı idmançı Saman Təhmasibi  (84 kq.) birinci döyüşdə, 1/8 finalda gürcüstanlı rəqibi Vladimir Qeqeşidzeyə uduzaraq yarışlardan kənarda qalıb.  -0-