İranlı “əmi” adlı narkotacirin kuryerləri Lənkəranda tutuldurlar

Bakı/11.09.23/Turan: Daxili İşlər Nazirliyi (DİN) Baş Narkotiklərlə Mübarizə İdarəsinin əməkdaşları tərəfindən Lənkəran şəhərində keçirilən əməliyyatda qanunsuz dövriyyədən 14 kq-dan artıq narkotik vasitə çıxarılıb.

DİN-in mətbuat xidmətinin məlumatına görə, narkotik vasitələrin qanunsuz dövriyyəsində şübhəli bilinən Vüqar Süleymanov və Əhməd Ömərov saxlanılıblar.

Onların üzərindən 1 kq-dan artıq heroin, 13 kiloqramdan çox qurudulmuş marixuana və 1 ədəd kəsici alət aşkarlanıb.

Saxlanılanlardan biri saxlanılan zaman polis əməkdaşlarına xəsarət yetirməyə cəhd edərək bu yolla hadisə yerindən yayınmağa çalışıb. Polis əməkdşaları tərəfindən bu cəhdin qarşısının alındığı bildirilir.

Araşdırmalarla V.Süleymanov və Ə.Ömərovun narkotik vasitələri “əmi” adı ilə tanıdıqları İran vətəndşaından Lənkəran şəhərində satış məqsədilə əldə etdikləri  müəyyən edilib.

Fakt üzrə əməliyyat-axtarış, əməliyyat-istintaq tədbirləri davam etdirilir. 0