İsmayıllıda müxbir saxlanılıb

Dünən axşam saatlarında “Cümhuriyyət” qəzetinin redaktor müavini və “Azərbaycan saatı” televiziya proqramının müxbiri Elçin İsmayıllı İsmayıllı rayon təhsil şöbəsinin qarşısında polis tərəfindən saxlanılıb.

Müxbirin qardaşı Elşən İsmayıllı Turan-a bildirib ki, qardaşını guya içkili vəziyyətdə ictimai yerdə kimlərisə söydüyünə görə polis saxlayıb.

“Elçin dünən axşam saat 20.30-da mənə polis tərəfindən saxlanması barədə mesaj yazıb. Ondan bir neçə dəqiqə əvvəl isə biz telefonla danışmışdıq, o içkili deyildi. Hazırda məhkəmənin qarşısında gözləyirik”, - o qeyd edib. 

Öz növbəsində İsmayıllı rayon polis şöbəsindən Turan-a bildirilib ki, Elçin İsmayıllı İnzibati Xətalar Məcəlləsinin 310-cu maddəsi (polis işçisinin qanuni tələbinə qəsdən tabe olmama) ilə günahlandırılır. O,  İsmayıllı Rayon Məhkəməsinə aparılıb.

Elçin İsmayıllı yazılarında İsmayıllı rayon rəhbərlərini tənqid edir. Yazıları dərc edildikdən sonra bir neçə dəfə rayondakı hökumətə yaxın şəxslər tərəfindən məhkəməyə verilib. Müxbirin saxlanması rayon polis şöbəsinin müavininin sərxoş halda qəza törətməsi ilə bağlı yazısından bir neçə gün sonraya təsadüf edir. -03B-