İsrail səfirliyinə qarşı terror aktı hazırlayanlar mühakimə olunublar

Bu gün Bakı Ağır Cinayətlər Məhkəməsində hakim Ənvər Seyidovun sədrliyi ilə “Eurovision-2012” mahnı müsabiqəsi ərəfəsində Azərbaycanda terror hadisəsi törətməyə cəhddə təqsirləndirilən şəxslərə hökm oxunub.

Məhkəmədəki mənbədən Turan-a verilən məlumata görə, hökmə əsasən Fariz Bayramov və  İbrahim Sadıqov 11 il, Azər Nəzərov 12 il müddətinə azadlıqdan məhrum edilib.

Onlar CM-in 274-cü (dövlətə xəyanət), 29,214.2.1, 29,214.2.3-cü (qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən, təkrar terrorçuluq törətməyə cəhd) və  228-ci (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) maddələri ilə təqsirli biliniblər.

Bununla da məhkəmə onları İsrailin Bakıdakı səfirliyini partlatmağa cəhddə təqsirli bilib. 

Məhkəmə zamanı onlar öz günahlarını qismən etiraf ediblər.

Xatırladaq ki, ötən ilin yazında MTN iş üzrə 40 nəfəri saxlayıb. Onlar bir sıra səfirliklərdə, eləcə də mahnı müsabiqəsi zamanı terror aktlarını törətmək məqsədilə İranın xüsusi xidməti tərəfindən ələ alınmaqda ittiham olunublar.  

Qrup üzvlərinin bir neçəsi artıq müxtəlif müddətə həbs olunub.-16B-