İstanbul-Bakı reyslərinin təxirə salınması barədə məlumatlar şişirdilib

İstanbuldan Bakıya aviareyslərin təxirə salınması barədə xəbərlər təsdiqlənmir.

Turk Hava Yolları-nın Bakıdakı nümayəndəliyindən Turan-a bildirilib ki, yanvarın 6-da İstanbuldan uçuşlar təxirə salınmayıb. Yalnız bir reys – 7 yanvar saat 8:15 reysi təxirə salınıb. Yanvarın 7-də digər üç reys yerinə yetiriləcək.

Qeyd edək ki, bəzi KİV yanvarın 6-7-də reyslərin ləğvi barədə Turk Hava Yolları-nın saytında yayılan məlumata isnad ediblər. Lakin şirkətin saytında belə məlumat yoxdur. Bundan əlavə, İstanbulda hazırda hava şəraiti yaxşıdır, havanın temperaturu +16 dərəcədir, yağıntı və külək yoxdur.

Hər gün İstanbuldan Bakıya və geriyə Turk Hava Yolları-nın, eləcə də AzAl Dövlət Şirkətinin bir neçə təyyarəsi uçur.

Azərbaycanın şimal-qərbində də qeyri-sabit hava şəraiti davam edir, qar yağır, yollar buz bağlayıb.

Azərbaycan-Gürcüstan sərhədində avtomobilin hərəkəti çətinləşib. Balakən  və Laqodexi arasındakı “Mazınçay” buraxılış məntəqəsində çətin vəziyyət yaranıb. “Sınıq körpü” məntəqəsində vəziyyət yaxşıdır.

Xatırladaq ki, Yeni il günlərində ənənəvi olaraq minlərlə Azərbaycan vətəndaşı Gürcüstana gedir. Onların çoxu öz avtomobillərində gedir.

Gürcüstan tərəfinin məlumatına görə, 2015-ci ildə bu ölkəyə Azərbaycandan 1,3 mln. turist gedib.

Həmçinin Yeni il ərəfəsində Azərbaycandan Türkiyəyə çox turist gedir. Onların bir hissəsi təyyarə, bir hissəsi öz avtomobili ilə Gürcüstan ərazisindən keçərək gedir.-02В-