İstintaq təcridxanasında fəala yaxınları ilə görüşləri əsassız olaraq qadağan edirlər

Bakı/04.01.23/Turan: 1 saylı Bakı İstintaq Təcridxanasında saxlanılan fəal İlhamiz Quliyevə yaxınları ilə görüş verilmir. Bu barədə qender fəalı və hüquq müdafiəçisi Aygül Cəfərova Facebook səhifəsində yazıb.

Onun sözlərinə görə, Quliyev bir aydır ki, istintaq təcridxanasında saxlanılır, lakin hələ də qohumları ilə görüş verilmir. Anası iki dəfə Ağdamdan gəlib, ancaq ona görüş verməkdən imtina ediblər.

Vəkil Zibeydə Sadıqova Turan-ın müxbirinə bildirib ki, fəalın anasına  bəhanə gətiriblər ki, görüş üçün müstəntiqin icazəsi olmalıdır.

Ancaq bu qanunsuz tələbdir, çünki məhbusun yaxınları ilə görüşü üçün müstəntiqin icazəsi tələb olunmur. Müstəntiq görüşlərə və telefon danışıqlarına qadağa qoya bilər, amma Quliyevlə bağlı belə bir qadağa yoxdur, vəkil qeyd edib.

O deyib ki, qanunvericiliyə əsasən, məhbusa həftədə bir dəfə yaxınları ilə 4 saat görüş, həftədə iki dəfə isə 15 dəqiqəlik telefon danışığı hüququ verilir.

"Quliyevin anasının onunla görüşməsinə qadağa qoyulması tamamilə qanunsuzdur və bununla əlaqədar Penitensiar Xidmətə və Ombudsman Aparatına şikayətlər göndərmişik", - vəkil deyib.

* Quliyev dekabrın 4-də saxlanılıb, ayın 6-da isə külli miqdarda narkotik maddə alverilə bağlı iş üzrə 4 ay müddətinə həbs edilib.

Hüquq müdafiəçilərinin fikrincə, Quliyevin həbsinin əsl səbəbi Abzas Media-ya verdiyi müsahibədir. O bildirib ki, polis cinayət işlərini saxtalaşdırmaq üçün sənədləşdirilməmiş narkotik maddələrdən istifadə edir.

İlhamiz Quliyev müsahibədə keçmiş polis əməkdaşı kimi təqdim olunub. Əvvəllər o, polis müstəntiqinin qeyri-rəsmi köməkçisi olub.- 06B-