Jurnalist Elçin Həsənovu yeni həbs təhlükəsi gözləyir

Jurnalist Elçin Həsənovu yeni həbs təhlükəsi gözləyir. Buna səbəb prokurorun Ali Məhkəməyə kassasiya protesti verməsidir.

Cinayət işinə 2015-ci ilin fevralında E.Həsənovla “Asiya” agentliyinin rəhbəri Cəfər Cəfərov arasındakı insident səbəb olub. İyunun 1-də məhkəmə onun 1 il müddətinə icbarı işə cəlb edilməsi barədə qərar çıxarıb.

Prokuror bu hökmdən etiraz verərək ittihamın daha ağır maddəyə  -   CM-in 221.3-ci maddəsinə  (odlu silah tətbiq etməklə xuliqanlıq) tövsif edilməsini və cəzanın 3,5 il müddətinə azadlıqdan məhrumetməyədək sərtləşdirilməsini tələb edib.

Lakin Apellyasiya Məhkəməsi cəzanı sərtləşdirməyərək birinci instansiya məhkəmənin hökmünü qüvvədə saxlayıb. Dörd ay keçdikdən sonra prokurorluq bu qərardan da kassasiya protesti verib.

“Bu gün mən Ali Məhkəmədən məktub aldım ki, prokuror Rizvan Şamməmmədov noyabrın 24-də Apellyasiya Məhkəməsinin qərarından kassasiya protesti verib və cəzanın sərtləşdirilməsini tələb edir. İşə yanvarın 17-də Ali Məhkəmədə İmran Hacıqayıbovun sədrliyilə baxılacaq”, - jurnalist bildirib.

Eyni zamanda jurnalist Sumqayıt məhkəməsinin məhkəmə qərarlarının icrası şöbəsindən xəbərdarlıq alıb ki, icbari işləri yerinə yetirmədiyinə görə onu 5 aydan 1 ilədək azadlıqdan məhrumetmə cəzası gözləyir.

E.Həsənov deyib ki, gəlirinin 20%-ni məhkəmə qərarlarının icrası şöbəsinin hesabına köçürməsi üçün ödənişli işi yoxdur. Məşğulluq idarəsində aylıq 125 manat əməkhaqqı ilə süpürgəçi işi təklif ediblər.

Jurnalist bildirib ki, hökmün yerinə yetirilməməsi üçün istənilən cəzanı çəkməyə hazırdır. “Ancaq görünür, məni daha ağır cəzalandırmaq istəyirlər və bu səbəbdən də kassasiya protesti verilib”.

*Elçin Həsənov Sumqayıtın “Yüksəliş naminə” İnternet qəzetinin (yukselis.info) redaktor müavinidir. Bundan başqa AXCP Ali Məclisinin üzvü və “Sumqayıt Gənclərinin Hüquqi Maarifləndirilməsi” QHT-nin sədr müavinidir.

E. Həsənova qarşı cinayət işinin başlanması onun korrupsiya və orduda mənimsəmə mövzusunda nəşrləri ilə eyni vaxta təsadüf edib. -06С-