Jurnalist İslam Şıxəli Baş Prokurorluqda dindirilib

Jurnalist İslam Şıxəli bazar ertəsi Azərbaycan Baş Prokurorluğunun Ağır Cinayətlər üzrə İstintaq İdarəsində dindirilib. Dünən onun kirayə qaldığı mənzildə axtarış aparılıb və onun şəxsi əşyaları müsadirə edilib.

“Məni niyə çağırdıqları elə də aydın deyil. Suallar, məsələn, “Meydan TV”, “Azadlıq radiosu”, yaşadığım mənzil, oradan müsadirə edilmiş əşyalara aid idi.

Maaşıma aid də suallar verirdilər”, deyə Şıxəli dindirmədən çıxdıqdan sonra Turan agentliyinə bildirib.

“Axtarış zamanı kameraları, kompüterləri, yaddaş kartlarını, telefon, bank çekləri, “Azadlıq radiosu”nda işləyənlərin diplomlarını, mükafatlarını götürüblər. Müstəntiqlər bütün bunların mənə niyə lazım olduğu ilə maraqlanıblar”, deyə Şıxəli bildirib.

İstintaq həmçinin onun konkret şəxslərlə əlaqələri ilə maraqlanıb. “Açığını desəm, soruşduqları insanlarla yaxın əlaqələrim yoxdur. Onları təsadüfən konfranslarda, məhkəmələrdə görmüşəm”, deyə Şıxəli bildirib.

O xatırladıb ki, artıq dəfələrlə prokurorluqda dindirilib. “Bu, təsadüfi deyil. Ölkəmizdə jurnalistlərin müntəzəm olaraq dindirilməsi və saxlanılması adi hal kimi qəbul edilir”, deyə Şıxəli bildirib.

Onun fikrincə, dindirmələr və saxlanmalar, çox güman ki, gənc jurnalistləri qorxutmaq məqsədi daşıyır. -16D06-