![Jurnalist ölkədən çıxışına icazə verilməsi üçün məhkəməyə müraciət edib](https://turan.az/resized/750/500/resize/media/2016/main/062700160331.jpg)
Jurnalist ölkədən çıxışına icazə verilməsi üçün məhkəməyə müraciət edib
Jurnalist Xədicə İsmayıl ölkədən çıxışına icazə verilməsi ilə bağlı məhkəməyə müraciət edib. X.İsmayıl bu barədə özünün Facebook səhifəsində yazıb.
Jurnalist bildirib ki, ölkədən çıxışına icazə verilməsi ilə bağlı Binəqədi Rayon Məhkəməsinə müraciət edib. Müraciət artıq icraata qəbul edilib.
Məhkəmə işə iyunun 28-də saat 17:00-da baxacaq.
X.İsmayıl qeyd edib ki, ATƏT-in Parlament Assambleyası İnsan Haqları Komissiyasının sədrindən, ABŞ Konqresinin nümayəndə heyətinin rəhbərindən dəvət alıb. Bundan başqa ATƏT-in media konfransında iştirak etməlidir.
Jurnalist məhkəmə müsbət qərar verərsə bu konfranslara qatılmaq niyyətindədir.
Xədicə İsmayıl 2014-cü il dekabrın 5-də həbs olunmuşdu. Jurnalist vergidən yayınma, qanunsuz sahibkarlıq kimi ittihamlarla 7 il 6 ay həbs cəzası almışdı.
Lakin o, ittihamları qəbul etmirdi və korrupsiya araşdırmalarına görə həbs olunduğunu bildirirdi.
X.İsmayıl mayın 25-də Ali Məhkəmənin qərarı ilə 3 il 6 ay şərti azadlıqdan məhrumetmə cəzası ilə sərbəst buraxılıb.
Ötən ay Sumqayıt məhkəməsi şərti azadlığa buraxılan hüquq müdafiəçisi İntiqam Əliyevin ölkədən çıxışına 10 günlük icazə vermişdi.-16d-
-
- Siyasət
- 27 İyun 2016 13:55
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz