Jurnalist ölümlə təhdid edilir

 Facebook-da “Azadlıq” radiosunun müxbiri Yafəz Əkrəmoğlu ölümlə təhdid edilir. Belə ki, Rauf Aliyev Gəngərli, Qamlo Qurban Naxcıvanlı, İlkin Cəlilov, Mətin Azəri, Səyyar Məmmədov, Elvin Aliyev, Tural Səfərov, Qamlo Qurbanov adları altında fəaliyyət göstərən istifadəçilərin  yaratdığı “Yafəz Əkrəmoğlu kimdir?” qrupunun üzvü Qamlo Qurban Naxcıvanlıi yazıb:  

“Bu adını jurnalist qoyan Yafəz Əkrəmoglu Naxcıvanımızı qaralamaq, hörmətli rəhbərlərimizin Naxçıvan üçün elədiklərinə kölgə salmaq istəyir”.  İstifadəçi jurnalistə qarşı təhqiramiz sözlər işlədərək onu Naxçıvanla bağlı tənqidi yazılar dərc etməməyə çağırır. 

“Ölüm olsun ona. Onu yox eləmək lazımdır ki, Naxçıvanın üstündən bu ləkə götürülsün. Bu gündən mən bu istiqamətdə işə başlayıram. Bilirəm ki, bu qrupda olanlar Yafəz Əkrəmoğlunu istəməyənlərdir. Kim Yafəzi yox eləmək işində mənə kömək edə bilərsə inboxuma yazsın. Qoy ... özü də buradan oxusun. Biz ona 10 gün vaxt veririk. Ya çıxsın elan eləsin ki, bir də Naxçıvan haqqında qarayaxma yazmayacaq, ya da onu yox eləmək planı işə düşəcək”, - Qamlo Qurban Naxcıvanlı adlı istifadəçi bildirir.   

Yafəz Əkrəmoğlu dəfələrlə təhdidlərlə üzləşib. Bir neçə ay bundan öncə jurnalist ölümlə hədələnib. 2011-ci ildə Naxçıvanda reportaj hazırladığı zaman Əkrəmoğlu zorla çıxarılaraq İran ərazisinə keçirilib. Yalnız təsadüf nəticəsində jurnalist Bakıya gələ bilib.

Öz növbəsində jurnalist Turan-a bildirib ki, bir qədər öncə Naxçıvan MR büdcəsinin xərclənməsi ilə bağlı yazı dərc edəndən sonra ona qarşı təzyiqlər artıb. 

“Hədələnməyimlə bağlı dəfələrlə polis və prokurorluq orqanlarına şikayət etmişəm. Müraciətlərimə indiyədək cavab almamışam. İndi də müraciət edəcəm.  Sabah vəkilimlə birgə şikayət verəcəm. Eyni zamanda müraciətlərimə cavab verməyən prokurorluq və polis orqanlarını məhkəməyə verəcəm”- Əkrəmoğlu qeyd edib.-03B-