Jurnalistə niyə xəbərdarlıq etmək istəyiblər?

Məni Bakı şəhər polisinə çağırıb jurnalist fəaliyyətimlə bağlı rəsmi xəbərdarlıq etdilər, amma xəbərdarlığı imzalamadım. Bu haqda Turana “Azadlıq” qəzetinin əməkdaşı Natiq Ədilov bildirib.

O, qeyd edib ki, polisə gedənə kimi çağırılmasının səbəbini bilməyib. Zəng edən şəxs polisə çağırılması haqda hər hansı səbəb göstərməyib. Jurnlaisti Bakı şəhər polisinin rəisi Rafiq Abasov və Bakı şəhər prokuroru Əziz Seyidov qəbul edib.

Hər iki orqan rəhbəri jurnalisti qəzet yazılarında və sosial şəbəkə paylaşımlarında əxlaqdan kənara çıxmaqda, dövləti aşağılamaqda ittiham ediblər. Predmetsiz iddialarla razılşamayan N.Ədilov hər iki şəxsə konkret hansı yazı və paylaşmalarına görə bu iradlara məruz qaldığını soruşub. Jurnalistə “belə yazıların çoxdur” cavabı verilib. N.Ədilov vəzifəli şəxslərə bu iradları jurnalist fəaliyyətinin qarşısının alınmasına yönələn cəhd, təzyiq, hədə-qorxu kimi dəyərləndirdiyini bildirib. Qarşılığında isə jurnalist “səni səhv yoldan çəkindirmək istəyirik” kimi cavab alıb. Bütün bu mükalimənin yekunu olaraq N.Ədilov yazılı xəbərdarlığı əsassız sayaraq imzalamayıb. 

Jurnalist onu da bildirib ki, belə təzyiqlərə məruz qalan yeganə şxəs deyil, buna qədər sosial şəbəkələrdə fəal olan bir sıra şəxslərə də tətbiq olunub. Müxtəlif səbəblər üzündən bu şəxslər məsələni ictimailəşdirməyiblər.

N.Ədilov bütün bu təzyiq və hədə-qorxulara cavab olaraq hər iki vəzifəli şəxsin hərəkətindən məhkəməyə müraciət etməyi nəzərdə tutduğunu bildirib.-05B-