“Milli Təhlükəsizlik Nazirliyi (MTN) kimləri isə qaralamaq istəyir. Ortada mənim oğlumdan istifadə etmək istəyirlər”. Bu barədə bu gün RATİ-nin mətbuat mərkəzində jurnalist Pərviz Həşimlinin hüquqlarının müdafiəsi ilə bağlı keçirilən mətbuat konfransında onun atası Kamran Həşimli bildirib.
Moderator.az saytının direktoru, “Bizim Yol” qəzetinin əməkdaşı, hüquq müdafiəçisi Pərviz Həşimli bu il sentyabrın 18-də həbs edilib. O, müxalifətdə olan AXCP-nin Ali Məclisinin üzvüdür.
Həşimli Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma) maddələrində nəzərdə tutulan cinayətləri törətməkdə şübhəli bilinərək həbs edilib. O, MTN-in təcridxanasında saxlanılır.
Mətbuat konfransında çıxış edənlər ittihamları sifariş adlandırıb və jurnalistin həbsdən azad edilməsini tələb edib.
Jurnalistin atası deyib ki, oğlunu MTN-nin generalı qeyri-rəsmi olaraq dindirir. “General Pərvizə deyib ki, taleyin öz əlindədir. Sən AXCP sədri Əli Kərimliyə bir neçə dəfə pul aparıbsan. Biz deyənləri yaz, bu yazın prezidentə göndəriləcək, mətbuatda çıxmayacaq. Pərviz qurana əl basıb ki, pul və silah məsələsi ilə bağlı hər hansı əlaqəsi yoxdur. Bu zaman general oğluma deyib ki, nə qədər dediklərimizi yazmayıbsan MTN-də girov qalacaqsan”, deyə K.Həşimli qeyd edib.
Ata oğlunun həqiqətən girovluqda olduğunu bildirib. “Mən media vasitəsi ilə Qırmızı Xaç Komitəsinə müraciət edirəm. Oğlumu girovluqdan azad etsinlər. Onun ailəsi ağır vəziyyətdə yaşayır, ona kömək etsinlər”.
O deyib ki, oğlunun evində axtarış zamanı ailəyə bir həftə belə bəs etməyən vəsait çıxıb.
“Silah alveri edən, kimlərəsə pul aparan insanın evində ən azı dolanışıq pulu çıxardı”, deyə o qeyd edib.
Kamran Həşimli hazırkı iqtidarı kəskin tənqid edib və nazirləri prezidentə yalan danışmaqda ittiham edib. “Bunlar kimləri isə vurmaq istəyirlər. Bunun üçün prezidentə yalan danışırlar. Pərviz Əli Kərimliyə pul aparırdısa, əməliyyat qurardınız pulu aparanda tutardınız, sonra da çəkdirib televiziyanızda efirə verərdiniz. Jurnalistin boynundan silah asmaq olmaz, sonda o silahlar sizin övladlarınızın boynundan asılacaq”, deyə ata bildirib.
Vəkil Elçin Sadıqov istintaq işinin aparılmadığını deyib. İndiyədək Pərviz Həşimli rəsmi qaydada dindirilməyib, yalnız bu gün dindirmə olacağını deyiblər. “Bu günədək Pərviz Həşimli yalnız qeyri-rəsmi qaydada dindirildiyini deyir. Hüquq elmində qeyri-rəsmi dindirmə anlayışı yoxdur. Bundan Rusiyada Orxan Zeynalova qarşı istifadə etdiklərini dedilər, Azərbaycanda isə Pərviz Həşimli qeyri-rəsmi dindirilir. Qara bazarda Makarov tipli tapançanın qiyməti 200-300 dollar olduğu halda jurnalistə qarşı olan cinayət işində bir tapançanın 2000 dollara alındığı yazılıb. Tapançaların hamısının nömrəsi ardıcıldır. Qaçamalçılıqda isə silahlar zavoddan alınmır ki, nömrələr dalbadal sıralansın”, deyə vəkil işin qurama olduğuna işarə edib.
O, jurnalistin saxlanma şəraitindin də normalara cavab vermədiyini deyib. “Ona istədiyi qəzetləri vermirlər, gəzintiyə çox az müddətə çıxarırlar, gəzinti yeri çox dardır və hətta günəş şüalarını görmək belə mümkün deyil. Ailəsi ilə görüş vermirlər. Kamerada qanunvericiliyə görə televizor qoyulmalı olduğu halda, bir radioqəbuledici var, ona da “Lider” radiosu qoşulub”, deyə vəkil qeyd edib.
Vəkil qanunsuz həbs, qanunsuz axtarışlar, həbsin ev dustaqlığı ilə əvəz olunması ilə bağlı müraciətlərini məhkəmənin təmin etmədiyini bildirib. Hazırda Avropa Məhkəməsinə şikayət hazırlanır.
E.Sadıqov jurnalistin həyatına təhlükə olduğunu da diqqətə çatdırıb. “Pərvizə deyiblər ki, elə vəziyyət yaradarıq ki, kamerada özünü asarsan”, deyə o vurğulayıb.
Jurnalistlər və hüquq müdafiəçiləri ölkədə ictimai fəal insanların, o cümlədən hər kəsin təhlükə altında yaşadığın bildirib. Onların fikrincə, jurnalist tezliklə vicdan məhbusu kimi tanınacaq.
Həşimlinin həyat yoldaşı İlahə Həşimli MTN əməkdaşlarının evlərində axtarış aparan zaman azyaşlı uşağının üzərinə silah çəkdiyini bildirib. “Bundan sonra uşağımız depressiyaya düşüb. Bir ay müalicə almasına baxmayaraq uşaq hələ də qorxu içərisindədir”, deyə o qeyd edib. -03C-
Cəmiyyət
-
Bakıda keçirilən COP29 konfransı mübahisələr və tənqidlərin kölgəsində başa çatdı. Tanınmış tarixçi Cəmil Həsənli bu tədbiri Prezident İlham Əliyevin rəhbərliyi altında Azərbaycanın idarəçilik problemlərinin parlaq əks olunması kimi xarakterizə etdi. Administrasiyanın qatı tənqidçisi olan Həsənli, COP29-u bahalı bir tamaşa adlandıraraq sistemli çatışmazlıqları üzə çıxardığını və Azərbaycanın siyasi və iqtisadi strukturlarına beynəlxalq diqqəti artırdığını vurğuladı.
-
Avropa Parlamenti Prezidenti Roberta Metsola azərbaycanlı iqtisadçı və siyasi məhbus, professor Qubad İbadoğlunu 2024-cü il Saxarov Mükafatı təqdimetmə mərasimində iştirak etmək üçün Strasburqa dəvət edib. Dəvət məktubu COP29 iqlim konfransı zamanı Avropa Parlamenti üzvü Maykl Bloss tərəfindən çatdırılıb. Lakin İbadoğlu hazırda ev dustaqlığında olduğu və Azərbaycandan çıxmasına qadağa qoyulduğu üçün dəvəti qəbul edə bilmir.
-
İstanbul Hava Limanında həyata keçirilən bir əməliyyat, diplomatik münasibətlərdə sarsıntı yarada biləcək bir hadisəni üzə çıxardı. Azərbaycan hərbi attaşesi olduğu iddia edilən Kəhrəman Şamil oğlu Məmmədov, 70 kiloqram qızıl ilə saxlanıldı. Türkiyə KİV-in məlumatına görə, Məmmədovun diplomat olması ilə bağlı açıqlamalarına baxmayaraq, hadisənin qızıl qaçaqmalçılığı ilə bağlı olduğu güman edilir.
-
Sərin bir noyabr axşamı, Bakının sakinləri Xəzər dənizinin sahilində toplaşaraq, sahilə vurulmuş nəhəng bir balinanın bədənini heyrətlə izlədilər. 16 metr uzunluğunda olan bu məxluqun cansız görünən forması və kəskin qoxusu bir çoxlarına ekoloji faciənin şahidi olduqlarını düşündürdü. Lakin bu gecə sirli qonaq artıq yox idi – yük platformasına yüklənərək hava limanına aparılmışdı.
Rəy yaz